فازڵ نەبی: بەغدا کۆمەڵێک مەرجی بۆ ناردنی مووچەی ئەمساڵ هەیە

ئاڤا نیوز

 

بریکاری پێشووتری وەزارەتی دارایی عێراق باس لەوە دەکات، بەغدا بۆ ڕەوانەکردنی مووچەی ئەمساڵی مووچەخۆرانی هەرێمی کوردستان کۆمەڵێک مەرجی هەیە.

 

وێنە گەورەکە: شاندێکی هەرێمی کوردستان کە لە ئومێد سەباح سەرۆکی دیوانی ئەنجوومەنی وەزیران، ئاوات شێخ جەناب وەزیری دارایی و ئابووری، ئامانج ڕەحیم سکرتێری ئەنجوومەنی وەزیران پێکهاتووە، بۆ پرسی مووچە و بودجە لە بەغدان و لەگەڵ لایەنە پەیوەندیدارەکان گفتوگۆ دەکەن.

 

لێدوانی فەرمی: فازڵ نەبی، بریکاری پێشووتری وەزارەتی دارایی عێراق، لەمیانی بەشداریکردنی لە هەواڵەکانی کاتژمێر 12:00ی ئاڤا ڕایگەیاند: ئەو شاندەی عێراق کە ئێستا لە هەرێمی کوردستانن، هاتوون بە هەماهەنگی لەگەڵ حکومەتی هەرێم لیستی مووچەی مانگی یەک ئامادە بکەن. ئەوان [ حکومەتی عێراق] کۆمەڵێک مەرجیان هەیە بۆ رەوانەکردنی مووچەی فەرمانبەران، یەکێک لە مەرجانە ئەوەیە بە دروستی لیستی مووچەی فەرمانبەران ئامادە بکرێت.

 

بریکاری پێشووتری وەزارەتی دارایی عێراق، گوتیشی: بەغدا دەیەوێت بە دروستی بزانێت داهاتی مانگانەی هەرێمی کوردستان چەندە و نیوەی داهاتەکەی دەوێت، ئەمەش بە کردەیی ئاسان نییە، چونکە بایۆمەتری لە هەرێم تەواو نەکراوە و ناوی دووبارە ڕەنگە هەبێت.

 

زانیاریی زیاتر: شاندەکەی هەرێمی کوردستان، دەتوانن ڕێکاری یاسایی بۆ چارەسەرکردنی کێشەی مووچەی مانگی 12 بگرنەبەر، پێش ناردنی خشتەی بودجە بۆ پەرلەمان، پێویستە هەوڵبدەن بڕە پارەیەک بۆ پشکی هەرێمی کوردستان لە بودجەی 2025 زیاد بکرێت، ئەمە ڕێگایەکی یاساییە.