وەزیری دەرەوەی سووریا پەیامێک بە زمانی کوردی بڵاودەکاتەوە

ئاڤا نیوز

وەزیری دەرەوەی سووریا پەیامێک بە زمانی کوردی بڵاودەکاتەوە و دەڵێت، کورد لە سووریا لەسەردەستی ڕژێمی ئەسەد ڕووبەڕووی ستەم بووەتەوە و ئەوان پێکەوە کار بۆ بوونیادنانی دادپەروەریی لە وڵاتدا دەکەن.

چیرۆکی سەرەکی: بەرپرسانی نوێی دیمەشق تائێستا چەندینجار باسی ئەوەیان کردووە کە کوردیش هاوشێوەی نەتەوە و پێکهاتەکانی دیکەی سووریا، مافە مەدەنییەکانی بەگوێرەی دەستووری داهاتوو گەرەنتی دەکرێت، بەڵام تائێستا گفتوگۆکانی کورد و دیمەشق بەفەرمی دەستیپێنەکردووە و بەکرداری هەنگاو نەنراوە.

لێدوانی فەرمی: ئەسعەد شیبانی، وەزیری دەرەوە لە حکومەتی ڕاگوزەری سووریا لە پەیامێکدا کە لە هەژماری تایبەتی خۆی لە تۆڕی ئێکس بڵاویکردووەتەوە ئاماژەی بەوەكردووە، "کورد جوانیی و درەوشاوەیی بە هەمەڕەنگی گەلی سووریا بەخشیووە، کۆمەڵگەی کوردییش لە سووریا و لەسەردەستی ڕژێمی ئەسەد ڕووبەڕووی ستەم بووەتەوە".

ئەوەشی خستووەتەڕوو، "ئێمە پێکەوە کاردەکەین بۆ بونیادنانەوەی وڵات بەجۆرێک هەمووان تیایدا هەست بە یەکسانیی و دادپەروەریی بکەن".