هەوڵی لادانی سەرۆکی پەرلەمانی عێراق دەدرێت

ئاڤا نیوز

پەرلەمانتارێک سەرۆکی پەرلەمان تۆمەتبار دەکات بەوەی بە یەک پاکیچ سێ یاسای بەیەکەوە تێپەڕاندووە، ئاماژە بەوەش دەکات کە ئەمە شکاندنی سوێندی دەستوورییە و دەبێتە هۆی لەدەستدانی پۆستەکەی.

چیرۆکی سەرەکی: دوێنێ سێشەممە، پەرلەمانی عێراق هەمواری یاسای باری کەسێتی کە داواکاری شیعەکان بوو، هەمواری یاسای لێبوردنی گشتی کە داواکاری سوننەکان بوو و گەڕانەوەی موڵکی داگیرکراو بۆ خاوەنەکانیان لە کەرکووک، داخوازی کورد و تورکمان بوو پەسند کرد.

ڕاگەیێنراوی فەرمی: محەممەد خەفاجی، ئەندامی لیژنەی یاسا لە پەرلەمانی عێراق ڕایگەیاند: سەرۆکایەتیی پەرلەمان بە پەسەندکردنی یاسا مشتومڕ لەسەرەکان بە یەک پاکێچ پێشێلکردنی هەموو عورفەکانە. ژمارەیەکی زۆری پەرلەمانتارانیش دژی تێپەڕاندنی ئەو یاسایانە بوون بێ ئەوەی ڕێژەی یاسایی تەواو بێت.

وتیشی: هەموو هەڵبژاردەکان کراوەیە لەبەردەم پەرلەمانتاران بۆ ئەوەی دژی ئەوە لە دادگەی باڵای فیدڕاڵی تانە لە دانیشتنەکە بکەن.

ئەوەی پێویستە بیزانیت: هاوپەیمانی ڕێبازی نیشتمانی کە بەشێکە لە چوارچێوەی هەماهەنگی شیعەکان و چەندین پەرلەمانتاری دیکە سکاڵایان لە دادگەی باڵای فیدڕاڵی دژی دانیشتنەکەی پەرلەمان تۆمار کرد.