فوئاد حوسین: هەفتەی داهاتوو کۆبوونەوەی نێوان شاندی کوردستان و دارایی عێراق دەکرێت

ئاڤا نیوز

فوئاد حوسێن، جێگری سەرۆکوەزیران و وەزیری دەرەوەی عێراق باسی کۆبوونەوەی هەفتەی داهاتووی نێوان شاندی حکومەتی هەرێمی کوردستان و وەزارەتی دارایی فیدرال دەکات کە بۆ دووەمجار بەڕێوەدەچێت. هاوکات جەخت لە گرنگیی بەشداریکردن لە کۆڕبەندی داڤۆس دەکاتەوە.

لێدوانی فەرمی: فوئاد حوسێن لە کۆنگرەیەکی ڕۆژنامەوانیدا ڕایگەیاند:

- لە هەفتەی داهاتوو کۆبوونەوەی شاندی هەرێمی کوردستان و وەزارەتی دارایی فیدراڵ بۆ دووەمجار بەڕێوەدەچێت، گفتوگۆ لەسەر داهاتی نانەوتی و ئەو ڕێژەیە دەکرێت کە بەر هەرێمی کوردستان دەکەوێت، بۆیە هیوادارین بگەینە ڕێککەوتنێک.

-هەر کاتێک دەنگ بە ماددەی 12 لە یاسای بوودجە بدرێت، کێشەی هەناردەکردنی نەوتی هەرێمی کوردستان چارەسەر دەبێت، چونکە هەناردەکردنەوەی نەوت پەیوەستە بە بڕیاری پەرلەمانی عێراق.

-بڕیاری گەڕاندنەوەی موڵک و ماڵی هاووڵاتییان کە بە گوێرەی بڕیاری ئەنجوومەنی حیزبی بەعسی هەڵوەشاوە داگیر کرابوو بۆ خاوەنەکانیان، بڕیارێکی گرنگ بوو کە دەبوو زووتر بدرێت، دوای ساڵانێکی زۆر لە زوڵم، عەدالەت هاتووەتە دی.

لەلایەکی دیکەوە: فوئاد حوسێن ئەوەشی ڕایگەیاند:

- سەردان و بەشداری لە کۆڕبەندێکی جیهانیی وەک داڤۆس گرنگە، بەڵام ئەوەی گرنگە ئەوەیە سەرۆکوەزیرانی هەرێمی کوردستان کۆمەڵێک سەرمایەداری لەگەڵ خۆی هێناوە بۆ داڤۆس.

- ئەو سەرمایەدارانە دەتوانن ڕۆڵی گەورە لە گەشەکردنی ئابووری کوردستان ببینن، چونکە کۆڕبەندەکە ئابوورییە و زۆرینەی کۆمپانیا گەورەکانی جیهان بەشدارییان کرووە، بۆیە پەیوەندی کۆمپانیاکانی کوردستان و کۆمپانیا جیهانییەکان گرنگە.