سەفین دزەیی: مەترسییەکانی گەڕانەوەی داعش هەیە و ڕوو لە زیادبوونن

ئاڤا نیوز

سەفین دزەیی، بەرپرسی فەرمانگەی پەیوەندییەکانی دەرەوەی حکومەتی هەرێمی کوردستان لە چاوپێکەوتنێکدا لە ماڵی کوردستان لە داڤۆس ڕایگەیاند، هەڕەشەی داعش هەر ماوە، بەتایبەت دوای ڕووداوەکانی سووریا، ئێستاش مەترسی گەڕانەوەی داعش هەیە و ڕوو لە زیادبوونن.

وێنە گەورەکە: ڕۆژنامەنووسی بەناوبانگی ئابووریی جیهان و کەناڵی CNN ڕیچارد کوێست، لە ماڵی کوردستان لە پەراوێزی کۆڕبەندی ئابووریی داڤۆس گفتوگۆیەکی تایبەتی لەگەڵ سەفین دزەیی کردووە و تاوتوێی چەندین تەوەر و باسیان کردووە.

لێدوانی فەرمی: لەبارەی ڕووداوەکانی سووریاوە سەفین دزەیی دەڵێت:

- ڕووداوە خێراییەکانی سووریا هەمووانی سەرسام کرد، تەنانەت ئیدارەی نوێی دیمەشقیش لە ناکاو بوو، سووریا وڵاتێکی گرنگە، بەڵام دەوڵەمەند نییە و پێویستە یارمەتی بدرێت.

- ئەوەی بۆ سووریا گرنگە یەکسانی هاووڵاتیبوونە، گەڕانەوەی ئاشتییە بەتایبەت بۆ کوردەکان، مافەکانیان بپارێزرێن، لەگەڵ مافی تەواوی پێکهاتەکانی.

- من پێم وایە ئێمە زۆر قەرزداری وەربەر‌هێنەرە ناوخۆییەکانمانین، زۆربەیان لێرە ئامادەن، ئەمانە لە کاتی سەختی حکومەتدا لەگەڵمان وەستاون، لە کاتە ئابوورییە قورسەکاندا، ئەو یارمەتیدەر بوون بۆ ئەوەی بتوانین بەردەوام بین لە ڕووی ژێرخان و سێکتەرە تایبەتەکاندا.

- ئێمە کیانێکی سەربەخۆ نین، بەشێکین لە عێراق و چەند کێشەیەکمان لەگەڵ بەغدا هەیە، لە ڕابردوو ئێمە دەجەنگاین بۆ ئەوەی بمێنینەوە، بەڵام ئێستا هەوڵی مانەوە و گەشەسەندن دەدەین.

- ئێمە پەیوەندی باشمان لەگەڵ بەغدا هەیە و لەگەڵ وەزیرەکانی حکومەت و ئەندامانی پەرلەمان لە پەیوەندیدان، بەڵام لەگەڵ ئەمەشدا ئێمە کێشەمان هەیە، کێشەی ئابووری و دارایی کێشەی بوودجە، هەروەها کێشەی وزە و کێشەی خاکمان هەیە، لەلایەکی دیکەوە ماددەی 140 ی دەستوور کە داوا دەکات ناوچەی جێی ناکۆکەکان لەڕێگەیی میکانیزمەوە چارەسەر بکرێن.

- بەهێزترین خاڵی هەرێمی کوردستان، بوێری و خۆراگری و ئیرادەی خەڵکی هەرێمی کوردستانە، ئێستا هاورێی نێودەوڵەتی زۆرمان هەیە.