ئاڤا داواکاریی مامۆستایەکی کەلاری گەیاند و کێشەکەی چارەسەر کرا

ئاڤا نیوز

 

وەزارەتی پەروەردە ڕەزامەندی لەسەر مۆڵەتی ئەو مامۆستایە دا کە بەهۆی نەخۆشی منداڵەکەیەوە لە دەرەوەی وڵاتە، دوای ئەوەی داوای لە ئاڤا میدیا کرد دەنگی بگەیەنێت بە لایەنە پەیوەندیدارەکان.

 

چیرۆکی سەرەکی: مامۆستایەکی ناسراوی ناحیەی ڕزگاری سەربە قەزای کەلار، ماوەی دوو ساڵە بۆ چارەسەری نەخۆشی منداڵەکەی مۆڵەتە و لە ئەمریکایە، لە ماوەی ڕابردوودا درێژکردنەوەی مۆڵەتەکەی کێشەی تێکەوتبوو چونکە بەپێی ڕێنماییەکان بۆی نەدەکرا بۆیە داوای لە ئاڤا میدیاکرد داواکارییەکەی بگەیەنێت بە لایەنە پەیوەندیدارەکان و مۆڵەتەکەی بۆ درێژ بکرێتەوە.

  
لێدوانی فەرمی: ئالان حەمەسەعید، وەزیری پەروەردە بە ئاڤا میدیای ڕاگەیاند: دوای بەرزکردنەوەی نووسراوی تایبەت بۆ زیادکردنی ساڵێکی دیکەی مۆڵەتی بێ مووچە بۆ مامۆستا ئارام، ڕەزامەندی لەسەر داواکارییەکە دراوە.
 
نووسراوی فەرمی: بەپێی نووسراوێک کە واژۆی د. ئومێد سەباح، سەرۆکی دیوانی ئەنجوومەنی وەزیرانی لەسەرە، ڕەزامەندی لەسەر ناوەڕۆکی نووسراوی تایبەت بە درێژکردنەوەی مۆڵەتی بێ مووچەی 'ئارام قادر ئەحمەد'، مامۆستا لەسەر میلاکی وەزارەتی پەروەردە، بەڕێوەبەرایەتیی گشتیی پەروەردەی گەرمیان، بەڕێوەبەرایەتیی پەروەردەی کەلار درا، بە لەبەرچاوگرتنی بارودۆخی مرۆیی ناوبراو.

 

ئەوەی پێویستە بیزانیت: ڕەزامەندییەکەی دیوانی ئەنجوومەنی وەزیران، ئاراستەی وەزارەتی پەروەردە دەکرێت، هاوکات لە هەفتەی داهاتوو دەگاتە بەڕێوەبەرایەتیی پەروەردەی کەلار.

 

نەخۆشیی منداڵەکەی مامۆستا ئارام چییە؟، نەخۆشییەکە ناوی پرۆتیۆس سێندرۆمە، نەخۆشییەکی بۆماوەیی دەگمەنە، لە هەموو جیهاندا کەمتر لە 200 تووشبووی هەیە، کەسی هەڵگری ئەم نەخۆشییە تووشی ئیفلیجی دەبێت و ئێسک و خانە ماسولکەییەکانی لە گەشەسەندن دەوەستن و دەپوکێنەوە، هەندێک بەشی جەستەش بە ناهەوسەنگی گەشە دەکەن.

 

- بە گشتی لەتەمەنی شەش مانگ تاوەکو 18 مانگ نیشانەکانی دەردەکەون و تاوەکو تەمەنیش هەڵکشێت لێکەوتەکانی زیاتر دەبێت و نیشانەکانی توندتردەبێت، لە دوای تەمەنی 10 ساڵیشەوە لێکەوتەکانی دەگەنە لووتکە.

 

- بەشی زۆری تووشبووانی ئەم نەخۆشییە لەژیاندا نامێننەوە، بۆیە ژمارەیەکی دروست نییە لە جیهاندا چەند کەس هەن بەڵام بەگشتی لە هەر یەک ملیۆن کەسێک، یەک تووشبووی ئەم نەخۆشییە هەیە.