دكتۆر دەشتی دزەیی لە تەمەنی 80 ساڵی كۆچی دوایی كرد

ئاڤا نیوز

 

دكتۆر دەشتی دزەیی، پزیشكی ناسراوی كوردستان دوای ماوەیەكی زۆر ململانێ لەگەڵ نەخۆشیی، لە تەمەنی 80 ساڵیدا كۆچی دوایی كرد، وەزیری تەندروستی حكومەتی هەرێمی كوردستانیش سەرەخۆشی لە خانەوادەكەی دەكات.

 

ئەوەی پێویست بیزانیت: پرۆفیسۆر دكتۆر دەشتی دزەیی لە 8-5-1945 لە هەولێر لەدایكبووە و ساڵی 1969 كۆلێژی پزیشكی لە زانكۆی مووسڵ تەواوكردووە، ڕاوێژكاری نەخۆشییەكانی هەناو، دامەزرێنەری زانكۆی هەولێری پزیشكییە، بەدرێژایی كاروانی ژیانی جگە لە خزمەتی پیشەیی و ئەكادیمی، چەندین نەوەی پسپۆڕی پزیشكی بۆ كوردستان بەرهەمهێنا، ڕۆڵی گرنگ و مێژوویی هەبووە لە پێشکەشکردنی خزمەتگوزاریی تەندروستیی بۆ پێشمەرگە و بزوتنەوەی رزگاریخوازی کوردستان.

 

ڕاگەیێنراوی فەرمی: بۆ كۆچی دوای پرۆفیسۆر دكتۆر دەشتی دزەیی، دكتۆر سامان بەرزنجی، وەزیری تەندروستیی هەرێمی كوردستان پرسەنامەیەكی بڵاوكردووەتەوە و سەرەخۆشی لە خانەوادەكەی دەكات.

 

وەزیری تەندروستی ئاماژەی بەوەكردووە، "دكتۆر دەشتی دزەیی، پێشڕەوی بواری پزیشکی کوردستان و دڵسۆز، بەوەفا و خۆشەویستی هاووڵاتیان بوو، خزمەتی زۆری مرۆڤدۆستی، هەژاران، هاووڵاتیان و چارەسەری نەخۆشی و بواری ئەکادیمی و فێرکردنی چەندین نەوەی پزیشکی کردووە، ڕۆڵی گرنگ و مێژوویی هەبووە لە پێشکەشکردنی خزمەتگوزاری تەندروستی بۆ پێشمەرگە قارەمانەکان و بزوتنەوەی رزگاریخوازی کوردستان."