لەبری زەوی شووقە و خانوو بە مامۆستا و فەرمانبەرانی سێ زانکۆ دەدرێت

ئاڤا نیوز

مامۆستایانی سێ زانکۆ و فەرمانبەرانی خوێندنی باڵا لە سنووری هەولێر لەبری زەوی، شووقە و خانوویان بۆ دروست دەکرێت کە نزیکەی دوو هەزار مامۆستای سوودمەند نەبوو، لێی سوودمەند دەبن.

وێنە گەورەکە: دوو پرۆژە لە دوو شوێنی جیاواز بۆ مامۆستایانی سوودمەند نەبوو لە زانکۆ، هەروەها فەرمانبەرانی خوێندنی باڵا لە سنووری هەولێر بە شێوازێکی سەردەمییانە دروست دەکرێن، سەرۆکی زانکۆی سەلاحەددین داوا لە سەرۆکوەزیران مەسرور بارزانی دەکات کارە ئیدارییەکانی پرۆژەکان بە زوویی تەواو بکرێن.

لێدوانی فەرمی: د. کامەران یونس، سەرۆکی زانکۆی سەڵاحەددین بە ئاڤا میدیای ڕاگەیاند: نزیکەی دوو هەزار مامۆستای سوودمەند نەبوو لە شووقەکانی کەمپی کۆنی زانکۆ سوودمەند دەبن، کە 70%یان مامۆستایانی زانکۆی سەڵاحەددینن، هەروەها لە 20%یان لە هەولێری پزیشکی و 10%ی بۆ زانکۆی پۆلیتەکنیکییە.

ئەوەی پێویستە بیزانیت: ئەو شووقانە لەسەر ڕووبەری 20 دۆنم زەوی دروست دەکرێن، دیزاینی پرۆژەکە لە دوو ژووری و سێ ژووری پێکهاتووە کە لەسەر ڕووبەری 120 و 150 مەتر دروست دەکرێن، لە کاتی جێبەجێکردنی پرۆژەکەش ئەگەری گۆڕانکاری لە کۆمپانیای جێبەجێکار و دیزاینی پرۆژەکەش هەیە.

ئەمەش بزانە: پرۆژەی دیکەی شووقە و خانوو لە کەمپی نوێی زانکۆی سەڵاحەددین بۆ فەرمانبەرانی وەزارەتی خوێندنی باڵا دروست دەکرێن. هەردوو پرۆژەکە لە ڕێکارە ئیدارەییەکاندان و نەخشەسازییەکەی لەلایەن وەزارەتی شارەوانی حکومەتی هەرێمی کوردستان دەکرێت.