هەزاران مامۆستا و فەرمانبەری وەزارەتی پەروەردە خانەنشین دەبن

ئاڤا نیوز

 

وەزیری پەروەردە دەڵێت، تاوەکو کۆتایی مانگی پێنجی ئەمساڵ هەزاران مامۆستا و فەرمانبەر دەبن بە 60 ساڵ و خانەنشین دەبن، چانسی لە پێشینەش بۆ پڕکردنەوەی بۆشاییەکان دەدرێت بە وانەبێژانی دابڕاو.

 

ڕاگەیێنراوی فەرمی: بەگوێرەی بڕیارێکی حکومەتی هەرێمی کوردستان کە ژمارەیەکی زۆری فەرمانبەر خانەنشین دەبن و بەشێوەیەکی کتوپڕ ئەرکەکانیان جێدەهێڵن، بەگوێرەی ڕێنمایی وەزارەتی دارایی 01-01-2025ـەوە وەک خانەنشین هەژمار دەکرێن، لە بەدواداچوونی ئاڤا دەرکەوتووە ژمارەیان نزیکەی 37  هەزار کەسە و 23%ـیان سەر بە وەزارەتی پەروەردەن.

 

لێدوانی فەرمی: د.ئالان حەمە سەعید، وەزیری پەروەردەی حکومەتی هەرێمی کوردستان دەڵێت، "بەگوێرەی ئەو داتایانەی کۆکراونەتەوە لە وەزارەت تاوەکو 31-05-2025،  پێنج هەزار و 534 مامۆستا و سەرپەرشتیار خانەنشین دەبن، چانسی لە پێشینەش بۆ وانەبێژانی دابڕاوە بۆ پڕکردنەوەی بۆشاییەکان."

 

گوتیشی، "لەماوەی دوو مانگی ڕابردووشدا نزیکەی 300 مامۆستا ئەوانەی لادراون یان پێشووتر بەهەر هۆکارێک وازیان هێناوە خراونەتە شوێنی ئەو مامۆستا گرێبەستانەی وازیان هێناوە یان بۆشایی هەیە، لە ئەنجوومەنی وەزیران ڕەزامەندی دراوە و گەڕاونەتەوە ناوەندەکانی خوێندن."

 

لە ماوەی ڕابردوو وەزارەتی پەروەردە بۆ ئەو مامۆستایانە بەستەرێکی تایبەتی بڵاوکردەوە، تاوەکو لەڕێگەیەوە فۆرمێک پڕکەنەوە و لەکاتی دروستبوونی بۆشایی سوودمەند ببن، ئینجا ئەوانەی فۆڕمەکەیان پڕکردووەتەوە قازانجیان کردووە و هیوادارین ئەوانەی سوودمەند نەبوون لە ئایندەیەکی نزیک ئەوانیش بگەڕێنرێنەوە ناوەندەکانی خوێندن.