کۆبوونەوەی لیژنەی تەکنیکی پارتی و یەکێتی دوادەخرێت

 

ئاڤا نیوز

بڕیاربوو لیژنەی تەکنیکی پارتی و یەکێتی پێنجەم کۆبوونەوەیان بۆ پێکهێنانی حکومەت و ڕەشنووسی دەسەڵاتی دامەزراوەکان بکەن، بەڵام بەهۆی چوونی شاندی باڵای حکومەتی هەرێمی کوردستان بۆ بەغدا چەند ڕۆژێک دواخرا.

چیرۆکی سەرەکی: بڕیاربوو ئەمڕۆ بۆ پێنجەم جار لیژنەی تەکنیکی پارتی و یەکێتی کۆببنەوە، بەڵام بەهۆی ئەوەی دوو لە ئەندامانی لیژنەکە کە د. ئومێد سەباح و ئامانج ڕەحیمن ئەندامی شاندی حکومەتن بۆ گفتوگۆ لەگەڵ بەغدا، ئەگەر کارەکانی شاندی تەکنیکی وەزارەتی دارایی عێراق لە هەولێر تەواوبێت ئەوا ڕەنگە سەردانی بەغدا بکەن و بۆیەش کۆبوونەوەی کۆتایی بۆ دارشتنی پێکهێنانی حکومەتی نوێ دواخراوە.

زانیاریی تایبەت: بەگوێرەی بەدواداچوونی ئاڤا دوایین کۆبوونەوەی لیژنەی تەکنیکی پارتی و یەکێتی بۆ  ڕەشنووسی دەسەڵاتەکانی سەرۆکی هەرێم، سەرۆکی حکومەت، جێگرەکانیان، دەسەڵاتی وەزیر و بریکاری وەزارەتەکان و ڕەشنووسێک بۆ کۆبوونەوەی باڵای نێوانیان لەبارەی دەسەڵاتە ئیداری و داراییەکان دواخراوە دەکەوێتە کۆتایی ئەم هەفتەیە.

زانیاریی زیاتر: چوار کۆبوونەوەی لیژنەی تەکنیکی پارتی و یەکێتیی لە هەولێر بەڕێوەچووە، لە کۆبوونەوەکانیشیان نەخشەی پێکهێنانی حکومەتی نوێ و شێوازی حوکمرانی گفتوگۆی چڕی نێوانیان بووە، لە کۆبوونەوەی داهاتوو ئەو 15% ـی ڕەشنووسەی ماوە تەواودەکرێت.

ئەمەش بزانە: ئەندامانی شاندی تەکنیکی پارتی و یەکێتی لە شەش کەس پێکهاتوون، لە پشتیوان سادق، دڵشاد شەهاب و د.ئومێد سەباح، لە پارتی و شاندی یەکێتیش پێکهاتوون لە د.ڕێواز فایەق، ئامانج رەحیم و شاڵاو شێخ سەڵاح پێکدێن.