لیستی مووچە ئامادەیە و بەغدا دوو داواکاری نوێی هەیە

ئاڤا نیوز

دوای هەفتەیەک کارکردن بە هاوبەشی، لەلایەن تیمی وەزارەتی دارایی عێراق و تیمە تەکنیکییەکانی وەزارەتی دارایی و ئابووریی کوردستان، ئەمڕۆ دووشەممە لیستی مووچەی مانگی یەک ئامادە کرا. لیستی خانەنشینان و تەرازووی پێداچوونەوە (میزان موراجەعە) مانگی 12ـی ساڵی ڕابردووش لە تەواوبووندایە.

چیرۆکی سەرەکی: کارەکانی کۆبوونەوەی هەردوو تیمی تەکنیکی وەزارەتی دارایی عێراق و بەڕێوەبەرایەتیی خانەنشینی عێراق لەگەڵ تیمی تەکنیکی وەزارەتی دارایی و ئابووریی هەرێمی کوردستان و یەکە ژمێریارییەکانی سەرجەم وەزارەتەکان و بەڕێوەبەرایەتی خانەنشینی کوردستان بەردەوامە.

زانیاریی تایبەت: ئاڤا زانیویەتی کۆتایی ئەم هەفتەیە هەردوو تیمەکەی عێراق کارەکانیان تەواو دەبێت و دەگەڕێنەوە بەغدا، ئەگەر هیچ کێشەیەک ڕوونەدات ئێوارەی ڕۆژی شەممە 2025-2-1، شاندی باڵای کوردستان دەچێتەوە بەغدا و لەگەڵ ئەنجوومەنی ئابووریی عێراق و تەیف سامی، وەزیری دارایی کۆدەبنەوە، لەگەڵ خۆیان لیستەکانی مووچە و خانەنشینی دەبەن و گفتوگۆ لەبارەی ڕێککەوتنێکی نوێ دەکەن بۆ خەرجکردنی مووچەی ئەمساڵی خەڵکی کوردستان و شایستە داراییەکان. 

دوو داواکاریی نوێ: وەزارەتی دارایی عێراق دوو داواکاری نوێی هەیە:

یەکەم: ئامادەکردنی لیستێک بۆ ئەو فەرمانبەرانەی پێویستە لە 60 ساڵی خانەنشین نەبن و لە دەوامکردن بەردەوام بن، لەگەڵ نووسینی هۆکارەکەی. هەندێکیان لە 63 ساڵی و هەندێکی دیکەیان لە 65 ساڵی خانەنشین دەبن.

دووەم: ئەو فەرمانبەر و مووچەخۆرانەی هەژماری بانکییان لە پرۆژەی هەژماری من کردووەتەوە، مووچە لە چ بانکێک وەردەگرن، بەغدا دەیەوێ ئەمەش بزانێت.

ئەمەش بزانە: ئەو فەرمانبەرانەی لە تەمەنی 60 ساڵی خانەنشین نابن دوو جۆرن: 

٠ کەسوکاری پلە یەک و پلە دووی شەهیدان، ئەو فەرمانبەرانەی یاسا و ئیمتیازاتی زیندانیکراو و ڕاگیراوی سیاسی دەیانگرێتەوە. ئەمانە لە 65 ساڵی خانەنشین دەبن.

٠ ئەوانەی لە تەمەنی 63 ساڵی خانەنشین دەبن، چوار توێژن ئەمانەن:

- ئەو فەرمانبەرانەی یاسای ڕاژەی زانکۆیی دەیانگرێتەوە و هەڵگری ناونیشانی (پڕۆفیسۆر یان پڕۆفیسۆری یاریدەدرن)

- پزیشکانی دادوەری و پزیشکانی سڕکردن و پزیشکانی دەروونی

- ڕاوێژکاران و ڕاوێژکارانی یاریدەدەر لە ئەنجومەنی شورای هەرێمی کورستان

- فڕۆکەوانی مەدەنی، ئەوانەی کاردەکەن وەک کاپتنی فڕۆکەن بەشێوەیەکی کرداری.