عێراق لەبارەی نەوت پێشنیازێکی نوێ ئاراستەی هەرێمی کوردستان دەکات

ئاڤا نیوز

وەزارەتی نەوتی عێراق پێشنیازی بۆ حکومەتی هەرێمی کوردستان کردووە کۆمپانیایەکی تایبەت بە بەرهەمهێنانی نەوت دابمەزرێنرێت و سۆمۆش سەرپەرشتی فرۆشتنی نەوت دەکات، لە بەرامبەریشدا هەرێمی کوردستان شایستە داراییەکانی خۆی لە چوارچێوەی بودجەدا وەردەگرێت.

ئەوەی پێویستە بیزانیت: هەولێر و بەغدا بۆ دەستپێکردنەوەی هەناردەی نەوتی هەرێمی کوردستان ڕێککەوتوون خەرجی بەرهەمهێنانی هەر بەرمیلێک نەوت بە 16 دۆلار دیاریبکرێت، بۆ ئەو مەبەستەش پڕۆژە هاوبەشەکەیان بۆ هەمواری یاسای بودجە لە پەرلەمانە و تاوەکو ئێستا دەنگدانی کۆتایی لەسەر نەکراوە.

لێدوانی فەرمی: عەلی معارج، بریکاری وەزارەتی نەوتی عێراق لەمیانی بەشداریکردنی لە پانێڵکدا لە کۆنگرەی عێراق بۆ وزە کە ئەمڕۆ لە بەغدا بەڕێوەچوو، وتی،

- ئەگەر پەرلەمانی عێراق هەمواری یاسای بودجە پەسەند بکات، دۆسیەی نەوت لەنێوان هەولێر و بەغدا هەنگاوێکی گەورە دەچێتە پێشەوە.

- هەردوولا خواستیان هەیە و ڕێککەوتنی نیمچەکۆتاییش هەیە بۆ ئاڵوگۆڕی داتاکانی تایبەت بە نەوت، "ئێمەش پێشنیازمان کردووە کۆمپانیایەک بەناوی کۆمپانیای نەوتی هەرێم هەبێت کە تایبەت دەبێت بە بەرهەمهێنانی نەوت.

- بەرهەمی نەوتیش دەچێتەوە ژێر دەسەڵاتی کۆمپانیای سۆمۆ، بەوەش دەوڵەت خاوەن یەک سیاسەتی فرۆشتن و داهاتی نەوتی دەبێت، لە بەرامبەریشدا حکومەتی هەرێم شایستەکانی خۆی وەردەگرێت".