لیستی مووچە گەیێنرایە دەست سوودانی و تەیف سامی

ئاڤا نیوز

لیستی مووچەی فەرمانبەرانی کوردستان گەیێنرایە دەست سوودانی و تەیف سامی، بڕیارە ئەم هەینییە لەگەڵ شاندی کوردستان لە بەغدا گفتوگۆی یەکلاکەرەوەی لەسەر بکەن، لە هەولێریش شاندی کوردستان ڕاپۆرت و لیستەکانیان تەواو کرد و سبەی سەردانی بەغدا دەکەن.

چیرۆکی سەرەکی: شاندی تەکنیکی وەزارەتی دارایی عێراق کە زیاتر لە هەفتەیەک لە هەولێر بوو، دوای تەواوکردنی ئەرکەکانیان و ئامادەکردنی ڕاپۆرتێک لەبارەی لیستی مووچەی فەرمانبەران بە هاوبەشی لەگەڵ وەزارەتی دارایی کوردستان، دوێنێ گەڕانەوە بەغدا. شاندەکەی وەزارەتی دارایی عێراق ئەمڕۆ ڕاپۆرتەکەیان ڕادەستی محەممەد شیاع سوودانی، سەرۆکوەزیران و تەیف سامی، وەزیری دارایی عێراق کردووە. هاوکات تاوەکو ئێستا شاندی بەڕێوەبەرایەتیی گشتیی خانەنشینانی عێراق لە هەولێرە و سەرقاڵی ئامادەکردنی لیستی خانەنشینانن.

ئەوەی پێویستە بیزانیت: بڕیارە دووسبەی کۆبوونەوەی شاندی کوردستان و وەزارەتی دارایی عێراق لە بەغدا بکرێت و لەبارەی مووچەی بڕیاری تێدا بدرێت کە ئەمساڵ بۆ هەر مانگێک چەند دەنێرن و چۆنیش دەینێرن، گفتوگۆکەش بۆ مووچەی یەک ساڵە نەوەک تەنیا مانگی یەک.

ئەمەش بزانە: لەمڕۆوە ڕاوێژکارەکانی سوودانی و تەیف سامی دەستیان بە دیراسەکردن کردووە، بۆ ئەوەی لە کۆبوونەوەکەی ڕۆژی هەینی بەرچاویان ڕوون بێت و گفتوگۆی لەسەر بکەن.

زانیاریی بەدەستهاتوو: هەندێ زانیاری لەبارەی ناوەڕۆکی ڕاپۆرتەکە ئاشکرا بووە، لەمبارەیەوە نەبیل مەرسووم، شرۆڤەکاری ئابووریی عێراق دەڵێت: مووچه‌ی مووچەخۆرانی كوردستان لە ساڵی 2025 زیاتر لە یەک تریلۆن دینار زیادبووە و ئەمساڵ پێویستە 13 تریلیۆن و 200 ملیار دینار تەنیا بۆ مووچەی خەڵکی کوردستان بنێردرێت.

هۆکارە زانراوەکان: بەهۆی ئەوەی نزیکەی 30 هەزار فەرمانبەر خانەنشین دەبن، بەشێکیان کە زیاتر لە 25 ساڵ خزمەتیان هەیە، پێویستە 12 مووچەیان بەیەکەوە پێبدرێت.


لەلایەکی دیکەوە: ئێوارەی ئەمڕۆ شاندی باڵای کوردستان لە هەولێر دوایین کۆبوونەوەیان لەبارەی مووچە کرد و ئامادەکارییەکانیان تەواو کرد. هاوکات لەلایەکی دیکەشەوە بڕیارە ئەمشەو لە ماڵی سوودانی کۆبوونەوەیەک لەمبارەیەوە بکرێت.

زانیاریی تایبەت: بەپێی زانیارییەکانی ئاڤا، لیستی مووچەی خانەنشینی کە بەغدا داوای کردبوو سێ تەمەن پێکەوە خانەنشین دەکرێن، بۆ ئەم مەبەستە 28 هەزار فەرمانبەر تۆمارکراون.

زانیاریی زیاتر: سبەی پێنجشەممە شاندە باڵاکەی هەرێمی کوردستان دەچێتە بەغدا و هەینی کۆبوونەوەکە دەکرێت.