د. ڤیان سەبری: لە کۆبوونەوەی سبەی مووچەی مانگی دوانزەش یەکلا دەبێتەوە

ئاڤا نیوز

سەرۆکی فراکسیۆنی پارتی لە پەرلەمانی عێراق ڕایگەیاند، لە کۆبوونەوەی سبەی هەینی شاندی هەرێمی کوردستان لەگەڵ شاندی بەغدا تاوتوێی پرسی مووچە دەکرێت بەتایبەت مووچەی مانگەکانی 12 و یەک.

وێنە گەورەکە: دوێنێ چوارشەممە، لە ماڵی محەممەد شیاع سوودانی، سەرۆكوەزیرانی عێراق، لە بەغدا لەگەڵ سەرۆک و جێگرانی سەرۆکی پەرلەمانی عێراق و سەرۆکی سەرجەم فراکسیۆنەکانی پەرلەمانی عێراق بەڕێوەچوو.

لێدوانی فەرمی: د. ڤیان سەبری، سەرۆکی فراکسیۆنی پارتی لە پەرلەمانی عێراق لەمیانەی بەشداریکردنی لەگەشتی هەواڵەکانی کاتژمێر 12ـی ئاڤا میدیا ڕایگەیاند، کۆبوونەوەی شەوی ڕابردوو تایبەت بوو بە پرسی هەناردەکردنەوەی نەوت، بەڵام دوای هاتنی شاندی هەرێمی کوردستان بۆ بەغدا، سبەینێ هەینی کۆبوونەوەی دیکە دەکرێت و تاوتوێی مووچە دەکەن.

زانیاریی زیاتر: بەپێی قسەی د. ڤیان سەبری، هەم شاندەکەی وەزارەتی دارایی هەرێمی کوردستان و هەم ئەوانیش سوورن لەسەر مووچە و دەڵێت ئەوەی بەلایانەوە گرنگە، پێویستە مووچەی مانگی 12 و مووچەی مانگی یەک دابینبکرێت.

ئەوەی پێویستە بیزانیت: دوای چارەسەرکردنی هەموو کێشەکان و داواکارییەکانی بەغدا لەسەر لیستی مووچە، ئێوارەی ئەمڕۆ شاندی باڵای هەرێمی کوردستان بەرەو بەغدا بەڕێدەکەوێت و بڕیارە سبەی لەبارەی مووچەی خەڵکی کوردستان لەگەڵ بەرپرسانی باڵای عێراق کۆببنەوە.