لە گوندی قەرەنازی قەزای بەردەڕەش پرۆسەی خوێندن وەستاوە

 

ئاڤا نیوز

لە گوندێکی قەزای بەردەڕەش ماوەی دوو ساڵە بە مەبەستی نۆژەنکردنەوەی قوتابخانەی گوندەکە، خوێندن وەستاوە.

چیرۆکی سەرەکی: گوندی قەرەناز سەر بە قەزای بەردەڕەش 101 ماڵە، 220 قوتابی لەو گوندە هەن، قوتابخانەیەکیان هەبوو، دوو ساڵ پێش ئێستا بەمەبەستی نۆژەنکردنەوە ڕوخاندیان و خوێندن تێیدا وەستا.

زانیاریی زیاتر: بەڵێندەری قوتابخانەکە کاری نۆژەنکردنەوەکەی ڕاگرتووە بە بیانوی وەرنەگرتنی پارە، لە ماوەی ئەو دوو ساڵەش قوتابییەکان هەموو ڕۆژ بە پێ بە سەرما و بە گەرما ماوەی نیو کاتژمێر ڕێگایان بڕیوە بۆ ئەوەی بچنە گوندێکی نزیک لە خۆیان بەمەبەستی خوێندن.

لێدوانی فەرمی: بەڵیندەری قوتابخانەکە بە ئاڤا میدیای ڕاگەیاند: "هەر کاتێک گوژمەی یەکەمی پارەکەم وەرگرت کە بڕی 20 ملیۆن دینارە، ڕاستەوخۆ بەردی بناغەی قوتابخانەکە دادەنێم و لە ماوەیەکی کەم تەواوی دەکەم".

زانیاریی پەیامنێر: ڕزگار کۆچەر پەیامنێری ئاڤا، لەسەر ئەو بابەتە قسەی لەگەڵ بەڕێوەبەری پەروەردەی بەردەڕەش کردووە بە تەلەفۆن، ئەویش پێی وتوە لە ڕێگام دەچم بۆ دهۆک بۆ چارەسەر کردنی ئەو کێشەیە.