مەشهەدانی: عێراق بەڕووی هەموو لایەکدا کراوەیە

ئاڤا نیوز 

سەرۆکی ئەنجوومەنی نوێنەرانی عێراق ڕایدەگەیێنێت، عێراق دەستبەرداری پرەنسیپە عەرەبی و ئیسلامییەکانی نابێت و بەڕووی هەموو لایەکیشدا کراوەیە.

 

چیرۆکی سەرەکی: لە میانی سەردانەکەی بۆ تاران، ڕۆژی دووشەممە 3-2-2025، مەحموود مەشهەدانی، سەرۆکی ئەنجوومەنی نوێنەرانی عێراق لەگەڵ محەممەد باقر قالیباف، سەرۆکی ئەنجوومەنی شورای ئێران کۆبووەوە.

 

لێدوانی ڕۆژنامەوانی: مەشهەدانی، لە کۆنگرەیەکی ڕۆژنامەوانی هاوبەشدا لەگەڵ هاوتا ئێرانییەکەی ڕایگەیاند: تاوتوێی سەرجەم دۆسیە گرنگەکانمان لەگەڵ لایەنی ئێرانی کرد، دیارترینیان دۆسیەی سنوورەکان، ئابووری و هاوکاری ئەمنی نێوان عێراق و ئێران بوون".

 

- "باسمان لە ڕێگاکانی پشتیوانی لە سەقامگیری ئەمنی ناوچەکە کرد"، جەختیشی لەوە کردەوە کە "عێراق دەستبەرداری پرەنسیپە عەرەبی و ئیسلامییەکانی نابێت و بەڕووی هەموو لایەکدا کراوەیە".

 

لەلایەکی دیکەوە: سەرۆکی ئەنجوومەنی شورای ئێران لە کۆنگرەکە ڕۆژنامەوانییەکەدا جەختی لەوە کردەوە: "لە هەوڵی پەرەپێدانی پەیوەندییەکانین لەگەڵ عێراق لە بوارە جیاجیاکاندا، لەگەڵ سەرۆکی پەرلەمان گفتوگۆمان لەسەر پەیوەندیی هێڵی ئاسن لەگەڵ عێراق کرد".

 

- جەخت لە پێویستی چالاککردنی لیژنە هاوبەشەکان لەگەڵ عێراق کرایەوە، خواست و ئیرادەی بەرگریمان لە جیهانی ئیسلامی و پەرەپێدانی پەیوەندییە سیاسی و ئابوورییەکان هەیە".