ئەنجوومەنی باڵای دادوەری ڕێنمایی بۆ جێبەجێکردنی یاسای لێبوردنی گشتی دەردەکات

ئاڤا نیوز

 

ئەنجوومەنی باڵای دادوەری عێراق بڕیاریدا، دادگای تێهەڵچوونەوە لیژنەی سەرەکی یان لاوەکی بۆ پێداچوونەوە بە دۆسیەی ئەو زیندانیکراوانە پێکبهێنێت کە بەر یاسای لێبوردنی گشتیی دەکەون.

 

چیرۆکی سەرەکی: 21ـی مانگی ڕابردوو پەرلەمانی عێراق یاساکانی باری کەسێتی، لێبوردنی گشتیی و گەڕانەوەی زەوییە کشتوکاڵییەکان بۆ خاوەنە ڕەسەنەکانی لە کەرکووک پەسەند کرد، یاسای لێبوردنی گشتیی کە خواستی سوننەکان بوو پێیان وایە بەهۆیەوە هەزار گەنجی ناوچەکانیان کە لەسەر بنەمای "شاهێدحاڵی نهێنی" سزادراون، ئازاد دەکرێن.

 

ڕاگەیێنراوی فەرمی: ئەنجوومەنی باڵای دادوەری عێراق، ئەمڕۆ دووشەممە ڕێنمایی بۆ جێبەجێکردنی یاسای لێبوردنی گشتی دەرکرد، بەگوێرەی ڕێنماییەکەش دادگای تێهەڵچوونەوەی لە بەغدا و پارێزگاکان، پێداچوونەوە بە داواکارییەکانی دووبارە لێکۆڵینەوە و دادگاییکردنەوەی ئەو سزادراوانە دەکات، کە یاسای لێبووردنی گشتی دەیانگرێتەوە.

 

زانیاریی زیاتر: لیژنەکە کە لە دادوەرانی دادگای تێهەڵچوونەوە پێکدێن، پێداچوونەوە بەو سزایانە دەکەن کە دادگای ئاسایشی ناوخۆ و دادگا سەربازییەکان دەریانکردوون، دۆسییەکانی دیکەش کە لە کاتی لێکۆڵینەوەدان یان پلەی کۆتاییان وەرگرتووە، لەلایەن دادوەری تایبەتمەندی دۆسییەکان یان سەرۆکایەتی دادگای تێهەڵچوونەوە پێداچوونەوەیان بۆ دەکرێت.