چوارچێوەی هەماهەنگی: پەسەندکردنی هەمواری بودجە گرنگ بوو

ئاڤا نیوز

 

سەرکردەکانی چوارچێوەی هەماهەنگی کۆبوونەوە و چەندین پرسیان تاوتوێ کرد و پەسەندکردنی هەمواری یاسای بودجەیان بەرز نرخاند، هاوکات داواش دەکات سەقامگیریی ئەمنیی لە ناوچەکە بەردەوام بێت.

 

وێنە گەورەکە: چوارچێوەی هەماهەنگی ڕۆژی دووشەممە بە ئامادەبوونی محەممەد شیاع سوودانی سەرۆکوەزیرانی عێراق، لە نووسینگەی هادی عامری کۆبوونەوەی ئاسایی خۆی کرد و دوایین پێشهاتەکانی گۆڕەپانی عێراق و نێودەوڵەتیی تاوتوێ کرد.

 

ڕاگەیێنراوی فەرمی: نووسینگەی ڕاگەیاندنی هاوپەیمانیی چوارچێوەی هەماهەنگی ڕایگەیاند: چوارچێوەی هەماهەنگی ڕۆڵی پەرلەمان و پەسەندکردنی بودجەی ساڵی 2025ی بەرز نرخاند، ستایشی ڕێوشوێنەکانی حکومەت لەسەر ئاستی ناوخۆیی و نێودەوڵەتیی کرد.

 

بەتەنیشت ئەم بابەتەوە: چوارچێوەی هەماهەنگی پێشوازی لەو سەقامگیرییە کرد کە ناوچەکە بەخۆیەوە دەبینێت. داواش دەکات هەوڵی زیاتری نێودەوڵەتیی بدرێت بۆ بەدەستهێنانی ئاسایش و سەقامگیریی و کارکردن بۆ چارەسەرکردنی لێکەوتەکانی جەنگ و پێشکەشکردنی پشتیووانی بۆ زیانلێکەوتووان.

 

باکگراوند: ڕۆژی یەکشەممەی ڕابردوو، پەرلەمانی عێراق بە زۆرینەی دەنگ هەمواری یاسای بودجەی گشتیی عێراقی پەسەند کرد، کەبڕگەیەکی هەموارەکە پەیوەست بوو بە هەناردەکردنەوەی نەوتی هەرێمی کوردستان.

 

کاریگەری ولێکەوتەکان: حەیان عەبدولغەنی، وەزیری نەوتی عێراق، ڕۆژی دووشەممە 3-2-2025 ڕایگەیاند: وەزارەتی نەوت و حکومەتی هەرێمی کوردستان هەماهەنگ دەبن لەگەڵ کۆمپانیای سۆمۆ بۆ هەناردەکردنەوەی نەوت، هاوکات چەندین ڕێکار گیراونەتەبەر لەگەڵ حکومەتی تورکیا بۆ ئامادەکردنی هێڵی بۆڕیی عێراق-تورکیا لەپێناو هەناردەکردنی نەوتی هەرێمی کوردستان لە بەندەری جەیهانی تورکییەوە.