سێ پارێزگای سوننی دژی بڕیارەکەی دادگای فیدڕاڵی دەوام پەکدەخەن

ئاڤا نیوز

دژ بە فەرمانە سالارییەکەی دادگای فیدراڵی بۆ ڕاگرتنی کارکردن بە یاسای لێبوردنی گشتی، پارێزگاکانی نەینەوا و سەڵاحەددین و ئەنبار بڕیاریاندا سبەی لە هەموو دامودەزگاکانی پارێزگاکانیاندا دەوام ڕابگیرێت و بکرێتە پشوو.


ئەوەی پێویستە بیزانیت: 21ی مانگی ڕابردوو پەرلەمانی عێراق لەکۆبوونەوەیەکی مشتومڕئامێزدا و بەیەک پاکێج یاسای لێبوردنی گشتی و باری کەسی و گەڕانەوەی موڵک بۆ خاوەنە ڕەسەنەکانیان پەسەند کرد، لەسەر سکاڵای چەند پەرلەمانتارێکیش ئەمڕۆ دادگای فیدراڵی فەرمانێکی سالاری بۆ ڕاگرتنی کارکردن بەهەرسێ یاساکە دەرکرد، تا ئەو کاتەی دادگاکە بڕیاری خۆی لەبارەی دەستورییبوونیان دەردەکات.

ڕاگەیێنراوی فەرمی: حکومەتی خۆجێی پارێزگاکانی سەڵاحەدین و نەینەوا  دژی بڕیارەکەی دادگای فیدراڵی بەیانیی و پارێزگای ئەنباریش بۆ سێ ڕۆژ بڕیاریاندا دەوام ڕابگرن، حکومەتی ناوخۆیی ئەو سێ پارێزگایە دەڵێن، هەموو ڕێکارێک ڕەتدەکەنەوە کە پێچەوانەی بنەمای دادپەروەریی بێت و مافی خەڵکی بێتاوان بێبەش بکات لە سوودمەندبوون لە یاساکە و بەدەستهێنانەوەی شکۆ و ئازادییان.

ئەمەش بزانە: محەممەد حەلبوسی، سەرۆکی حیزبی تەقەدومیش دژی بڕیارەکەی دادگای فیدراڵی، داوای خۆپیشاندانی فراوان کرد و دەڵێت، دادگای فیدراڵی نادەستورییە و بە سیاسی کراوە، ڕێزیش لە ڕێککەوتنی نێوان پێکهاتەکان ناگرێت.

لەلایەکی دیکەوە: لای خۆیەوە هاوپەیمانی سیادەی سوننەکانیش سەرسوڕمانی قووڵی خۆی دەربڕی لە بڕیارەکەی دادگەی فیدراڵی و پێیوایە ئەو هەوڵانەی لەو بارەیەوە دەدرێن "کاردانەوە و کاریگەریی نەرێنییان لەسەر سەقامگیری سیاسی و کۆمەڵایەتی دەبێت.