دادگای باڵای فیدراڵی وەڵامی ئەنجوومەنی باڵای دادوەری دەداتەوە

ئاڤا نیوز

دادگای باڵای فیدراڵی وەڵامی بەیاننامەی ئەنجوومەنی باڵای دادوەری دەداتەوە و دەڵێت "بڕیارەکانی بەپێی دەستوور پابەندکەرن".

 

چیرۆکی سەرەکی: ئەنجوومەنی باڵای دادوەریی عێراق دووپاتی دەکاتەوە، نابێت هیچ یاسایەک ڕابگیرێت کە پەرلەمانی عێراق دەریکردووە پێش ئەوەی لە ڕۆژنامەی فەرمی بڵاوبکرێتەوە و بڕیاری دادگای باڵای فیدراڵی لەم بارەیەوە کاتییە و پابەندکەر نییە.

 

ڕاگەیێنراوی فەرمی: دادگەی باڵای فیدراڵی عێراق لە بەیاننامەیەکدا ڕایگەیاند، "بڕیارەکانی دادگای باڵای فیدراڵی، بەپێی بڕگەکانی ماددەی 94 ـی دەستوور، کۆتایی و پابەندکەرن بۆ سەرجەم دەسەڵاتداران نابێت بەهیچ شێوەیەک پێشێل بکرێن.

 

ئەوەی پێویستە بیزانیت: ئەمڕۆ چوارشەممە، ئەنجوومەنی باڵای دادوەریی عێراق بە سەرۆکایەتیی فایق زێدان کۆبوونەوەیەکی ئەنجامدا و هەڵوێستی خۆی دەربارەی بڕیارەکەی دادگای باڵای فیدراڵی سەبارەت بە ڕاگرتنی کارکردن بە یاسای لێبوردنی گشتی، باری کەسی و گەڕانەوەی موڵک بۆ خاوەنە ڕەسەنەکانیانیان دەربڕی.

 

باکگراوند: لە 21-01-2025 پەرلەمانی عێراق هەر سێ یاسای گەڕانەوەی موڵکی داگیرکراو بۆ خاوەنەکانیان لە کەرکووک و ناوچەکانی ماددەی 140، لێبوردنی گشتی و یاسای باری کەسێتی، بەیەک پاکێج پەسەند کرد. دواتر دادگای فیدراڵی کارکردنی بە یاساکان بەشێوەکی کاتی ڕاگرت.