سەرۆکی پەرلەمان داوای کۆبوونەوەیەکی فراوان و بەپەلە دەکات

ئاڤا نیوز

سەرۆکی ئەنجوومەنی نوێنەرانی عێراق داوا کۆبوونەوەیەکی فراوان و بەپەلە لە هێزە سیاسییەکان و سەرجەم ئەندامانی هاوپەیمانی ئیدارەی دەوڵەت دەکات بۆ کۆتاییهێنان بەو ناکۆکییە سیاسیانەی کە لەم دواییانەدا سەریان هەڵداوە.

 

وێنە گەورەکە: ڕاگرتنی کارکردن بە چەند یاسایەک لەلایەن دادگای باڵای فیدراڵییەوە، کاردانەوەی لایەنەکان و بە دیاریکراویش لایەنە سوننەکانی لێکەوتەوە. بەمەشەوە نەوەستا ئەنجوومەنی باڵای دادوەری دژ بە بڕیارەکەی دادگەی فیدراڵی وەستایەوە و بڕیارەکەی دادگای فیدڕاڵی ڕەتکردەوە، زۆری نەبرد دادگای باڵای فیدراڵیی وەڵامی ئەنجوومەنی باڵای دادوەری دایەوە و ڕایگەیاند "بڕیارەکانی بەپێی دەستوور پابەندکەرن".

 

ڕاگەیێنراوی فەرمی: مەحموود مەشهەدانی، سەرۆکی ئەنجوومەنی نوێنەرانی عێراق لە ڕاگەیێنراوێکدا دەڵێت: لە چوارچێوەی بەرپرسیارێتی نیشتمانی و لێکەوتەکانی گۆڕەپانی سیاسی، داوا لە هێزە سیاسییەکان و سەرجەم ئەندامانی هاوپەیمانی ئیدارەی دەوڵەت دەکەین بۆ سازدانی کۆبوونەوەیەکی فراوان و بەپەلە بۆ گفتوگۆکردن لەسەر ئاڵنگارییەکانی بەردەم عێراق، بەمەبەستی یەکخستنی دیدگای نیشتمانی و کۆتاییهێنان بەو ناکۆکییە سیاسیانەی کە لەم دواییانەدا سەریان هەڵداوە.

 

ئەوەی پێویستە بیزانیت: ڕۆژی سێشەممە 4-5-2025، دادگای فیدڕاڵیی عێراق بەشێوەیەکی کاتیی کارکردنی بە هەرسێ یاسای گەڕانەوەی زەوییە کشتوکاڵییەکان بۆ خاوەنە ڕەسەنەکانیان، باری کەسێتی و لێبوردنی گشتی ڕاگرت، تا ئەو کاتەی ئەو سکاڵایانەی لەبارەیانەوە تۆمارکراون لەلایەن دادگاکەوە یەکلایی دەکرێنەوە.

 

باکگراوند: لە 21-01-2025 پەرلەمانی عێراق هەر سێ یاسای گەڕانەوەی موڵکی داگیرکراو بۆ خاوەنەکانیان لە کەرکووک و ناوچەکانی ماددەی 140، لێبوردنی گشتی و یاسای باری کەسێتی، بەیەک پاکێج پەسەند کرد. دواتر دادگای فیدراڵی کارکردنی بە یاساکان بەشێوەکی کاتی ڕاگرت.