لە 72 کاتژمێر نزیکەی 250 بوومەلەرزە لە دەریای ئیجە دەدات

 

ئاڤا نیوز

بوومەلەرزەکانی دەریای ئیجە مەترسی ڕژد لەسەر کەناراوەکانی یۆنان و تورکیا دروست دەکات و مەترسی ڕوودانی تسۆنامی هەیە.

وێنە گەورەکە: لە 72 کاتژمێری ڕابردوو زیاتر لە 200 بوومەلەرزە لە دەریای ئیجە دەدات و هەریەک لە یۆنان و تورکیا دەستیان بە ئامادەکاری خێرا کردووە لە ئەگەری ڕوودانی تسۆنامی و کارەساتی سروشتی.

ئەوەی ئێستا روودەدات: یۆنان هەنگاوی ڕژدی ناوە بۆ رووبەروبوونەوەی مەترسییەکان کە ئەمانەن:

•    پشووی فەرمی لە قوتابخانەکانی چوار دوورگەی نزیک لە بوومەلەرزەکان.

•    هەڵوەشانەوەی گشت چالاکییەکان.

•    ئامادەکردنی تیمی فریاگوزاری خێرا.

•    دابینکردنی درۆن بۆ چاودێریکردنی بەردەوام.

•    ئامادەکردنی تیمی فریاگوزاری هێلیکۆپتەر.

•    چالاککردنی خزمەتگوزاری پەیوەندی خێرا.

ئەوەی پەیوەندیدارە بە ئامادەکارییەکانی تورکیا:

پ. د. ئۆرهان تەتەر، بەڕێوەبەری گشتی بوومەلەرزە و کەمکردنەوەی مەترسییەکان لە وەزارەتی ناوخۆی تورکیا بە ئاژانسی ئەنادۆڵی تورکی راگەیاند: بەهۆی ئەوەی بەشی زۆری بوومەلەرزەکان لە هێڵی بوومەلەرزەی سانتۆرینی (دوورگەیەکی یۆنان لە دەریای ئیجە) روودەدەن، ئەگەری کاریگەری راستەوخۆی لەسەر ناوچەکانی تورکیا نیە و هێڵی بوومەلەرزە ڕاستەوخۆ نەبەستراوەتەوە بە تورکیا. لەگەڵ ئەوەشدا، رەنگە تورکیا بکەوێتە ژێر کاریگەری دووکەڵ و تۆزی ئەو کانە گڕکانانەی ئەگەری تەقینەوەیان هەیە لە ناوچەکە.

تەتەر ئاماژەی بەوەشداوە ئەوەی کە هەیە لەنێو بوومەلەرزەکان تاوەکو ئێستا بەهێزترین بوومەلەرزە گوڕەکەی 5.2 بووە و بەراورد بە هێڵی بوومەلەرزە لەو ناوچەیە گوڕەکە ئاساییە و ئاستی مەترسی زۆر نیە.