عێراق بۆ وەرگرتنی سكۆلەرشیپ ڕێنمایی نوێ بە هەرێمی كوردستان دەدات

ئاڤا نیوز

لیژنەی باڵای پەرەپێدانی خوێندن لە عێراق بۆ وەرگرتنی سكۆلەرشیپی خوێندنی باڵا، ڕێنمایی و مەرجی نوێ دەردەكات و داواشی كردووە هەرێمی كوردستانیش پێیوە پابەند بێت.

وێنە گەورەكە: لیژنەی باڵای پەرەپێدانی خوێندن لە عێراق (HCED) كە ڕاستەوخۆ بە نووسینگەی سەرۆكوەزیرانی عێراقەوە بەستراوەتەوە و چاودێری دەكرێت، مەرج و ڕێنمایی نوێ بۆ وەرگرتنی سكۆلەرشیپی خوێندنی باڵا (ماستەر، دكتۆرا و ڕاهێنانی پزیشكی) بۆ ساڵی نوێی خوێندن دەردەكات و گشتاندن بۆ سەرجەم وەزارەتەكانی حكومەتی فیدراڵی و حكومەتی هەرێمی كوردستان ڕەوانە دەكات كە لەمەودوا لەكاتی پێدانی مۆڵەتی خوێندن بۆ كاندیدە دەرچووەكانی سكۆلەرشیپ، پێیوە پابەند بن.

نووسراوی فەرمی: لە نووسراوەكەی لیژنەی باڵای پەرەپێدانی خوێندن لە عێراق، مەرجی بڕوانامەی ئایەڵتسی توانستی زمانی ئینگلیزی، ئێجگار سەخت كراوە و كاندید بۆ خوێندنی ماستەر دەبێت،

- لانیكەم 5.0 نمرە بەدەستبهێنێت و بۆ خوێندنی دكتۆراش دەبێت 6.5 نمرە بەدەستبهێنێت، هەروەها لە هەمان پسپۆڕی خۆی و كارەكەی لە وەزیفەی گشتیدا خوێندنی ماستەر و دكتۆر تەواو بكات.

- كۆنمرەی بڕوانامەی بەكالۆریۆس و مەرجی تەمەنیش لەبەرچاو دەگیرێت. ڕێژەی 15%ـی نمرەكانیش لەكاتی چاوپێكەوتنی كاندید دیاری دەكرێت.

زانیاریی زیاتر: ڕێژەی 5%ـی كورسییەكانی سكۆلەرشیپ بۆ كەسوكار و خانەوادەی شەهیدان دانراوە و كارئاسانی پێویستیان بۆ دەكرێت.