داوادەکرێت سێ پارێزگاری سوننە مەزهەب لەپۆستەکانیان دووربخرێنەوە

ئاڤا نیوز

دوای ئەوەی بەدەم بانگەوازەکەی محەممەد حەلبووسی، سەرۆکی "پارتی تەقەدووم"ـەوە چوون، هەوڵێکی پەرلەمانی بۆ دوورخستنەوەی پارێزگارانی نەینەوا و سەڵاحەددین و ئەنبار لەپۆستەکانیان دەستیپێکردووە.

چیرۆکی سەرەکی: دژی بڕیارەکەی دادگای فیدراڵی، محەممەد حەلبوسی، سەرۆکی حیزبی "تەقەدوم" داوای خۆپیشاندانی فراوانی کرد،  هەرسێ پارێزگاری نەینەوا و سەڵاحەددین و ئەنبار دەوامی فەرمییان لە سەرجەم دامودەزگاکانی پارێزگاکانیاندا ڕاگرت و خۆپیشاندانیان ڕێکخست.

لێدوانی فەرمی: باسم خەشان، پەرلەمانتاری عێراق بەئاڤا میدیای ڕاگەیاند:

- هەڵوێستی پارێزگارەکانی نەینەوا و سەلاحەدین و ئەنبار، پێشێلکارییەکی ڕوون و ئاشکرایی دەستووری عێراقە و لەبەرامبەردا بەرەیەکی پەرلەمانی پێکهێنراوە بۆ دوورخستنەوەی ئەو سێ پارێزگارە لەپۆستەکانیان لەڕێگەی یاساوە.

- هەمان داواکاری پێشکەش بە سەرۆکوەزیران دەکەن تاوەکو هەموو دەسەڵاتەکانی دژی ئەو سێ پارێزگارە بەکاربهێنێت.

ئەوەی پێویستە بیزانیت: دادگای فیدراڵی عێراق بەشێوەیەکی کاتیی کارکردنی بە هەرسێ یاسای گەڕانەوەی زەوییە کشتوکاڵییەکان بۆ خاوەنە ڕەسەنەکانیان لە کەرکووک، باری کەسێتی و لێبوردنی گشتی ڕاگرت، تا ئەو کاتەی ئەو سکاڵایانەی لەبارەیانەوە تۆمارکراون لەلایەن دادگاکەوە یەکلایی دەکرێنەوە.