خۆپیشاندان لە بەسرە بەردەوامە

ئاڤا نیوز

ماوەی چەند ڕۆژێکە خۆپیشاندان لە ناوچە جیاجیاکانی پارێزگای بەسرە دەستیپێکردووە، داواکاری سەرەکی خۆپیشاندەران بریتین لە دامەزراندن و باشترکردنی خزمەتگوزاری و دۆخی ئابووری.

 

وێنە گەورەکە: نەبوونی خزمەتگوزاری و خراپیی دۆخی ئابووری، ماوەی چەند ڕۆژێکە بە سەدان خۆپیشاندەری لە شارۆچکەی قوڕنە و چەند ناوچەیەکی جیای لە پارێزگای بەسرە هێناوەتە سەر شەقامەکان.

 

بینراو و بیستراو: بە گوێرەی ئەو دیمەن و گرتە ڤیدیۆییانەی لە تۆڕە کۆمەڵایەتییەکان و میدیای عێراق بڵاو دەکرێنەوە، بە سەدان خۆپیشاندەر لە شارۆچکەی قوڕنە ڕژاونەتە سەر شەقامەکان و داواکاری سەرەکیشیان بریتییە لە دامەزراندن و باشترکردنی دۆخی خزمەتگوزاری و ئابووری.

 

ئەوەی پێویستە بیزانیت: یەکشەممە، 2ـی شوباتی 2025، دەیان کەس لە براوەکانی تیروپشکی 13 هەزار پلەی وەزیفی، کە زیاتر لە پێنج مانگ لەمەوبەر لە لایەن حکوومەتی خۆجێییەوە ڕاگەیەندرابوو و گرێبەستیان لەگەڵیاندا نەکراوە، لەبەردەم ئەنجوومەنی پارێزگای بەسرە خۆپیشاندانیان کرد.

 

لەلایەکی دیکەوە: ڕۆژی پێنجشەممە 5ی شوبات، سەرۆکوەزیرانی عێراق پێشوازی لە کۆمەڵێک نوێنەری خەڵکی قەزای سادق لە پارێزگای بەسرە کرد و گوێی لە داواکارییەکانیان گرت و فەرمانی کرد کاری تیمی هەوڵی خزمەتگوزاری و ئەندازیاری لەپڕۆژە خزمەتگوزارییەکاندا فراوانتر بکرێت.