ڕێکخراوی بەدر لە ڕێگەی ئاڤاوە وەڵامی 12 کۆنگرێسمانی ئەمریکا دەداتەوە

ئاڤا نیوز

 

ڕێکخراوی بەدر بە سەرۆکایەتیی هادی عامری وەڵامی داواکارییەکی 12 کۆنگرێسمانی ئەمریکا دەداتەوە کە داوا دەکەن وڵاتەکەیان بەدر وەک ڕێکخراوێکی تیرۆرسیتی بناسێنێت. بەرپرسێکی ئەو ڕێکخراوەش دەڵێت، "ئەو داواکارییانە جێبەجێ ناکرێن".

 

وێنە گەورەکە:  لە چەند ڕۆژی ڕابردوودا 12 ئەندامی کۆنگرێسی ئەمریکا نامەیەکیان ئاڕاستەی وەزیری دەرەوەی وڵاتەکەیان کردبوو کە ڕێکخراوی بەدر و سەرجەم گرووپە چەکدارەکانی سەر بە ئێران وەکو ڕێکخراوی تیرۆریستی بناسێنن. ئەوان دووپاتیان کردەوە کە دۆناڵد ترەمپ، سەرۆکی ئەمریکا ئەو کارە دەکات.

 

لێدوانی فەرمی: محەممەد بەیاتی، بەرپرسی لقی باکووری ڕێکخراوی بەدر بە سەرۆکایەتیی هادی عامری بە ئاڤا میدیای ڕاگەیاند: "ئەم داواکارییانە هیچ بەهایەکی نییە. بەدر، ڕێکخراوێکی سیاسیی عێراقییە و دەستی لە چەک هەڵگرتووە، سەرکردایەتیی ڕێکخراوەکە دابڕاو نین لەگەڵ لایەنی دیپلۆماسی فەرمیی ئەمریکا، باوەڕمان بەوە نییە کە ئەو جۆرە بانگەوازانە جێبەجێبکرێت، بانگەوازی کەسیین نەک فەرمی".

 

ئەوەی پێویستە بیزانیت: ڕێکخراوی بەدر کە هادی عامری سەرۆکایەتیی دەکات یەکێکە لەهێزە چەکدارەکانی نزیک لە ئێران و لە چوارچێوەی هێزەکانی حەشدی شەعبی کاردەکات.