فیدان و عێراقچی پەیوەندییەکانی نێوان تورکیا و ئێران تاوتوێ دەکەن

ئاڤا نیوز

 

هاکان فیدان، وەزیری دەرەوەی تورکیا لەگەڵ هاوتا ئێرانییەکەی عەباس عێراقچی پەیوەندییەکی تەلەفۆنی ئەنجامدا و دۆخی غەززە و پەیوەندییەکانی نێوان تورکیا و ئێرانیان تاوتوێ کرد.

 

چیرۆکی سەرەکی: ئەنجامدانی ئەو پەیوەندییە تەلەفۆنییە لەدوای سەردانەی ئیبراهیم کاڵن، سەرۆکی دەزگای هەواڵگری تورکیا بۆ تاران دێت کە لەگەڵ هەریەک لە ئیسماعیل خەتیب، وەزیری ئیتلاعاتی ئێران و عەلی ئەکبەر ئەحمەدیان سکرتێری گشتیی ئەنجوومەنی باڵای ئاسایشی نەتەوەیی ئێران لە تارانی پایتەختی ئێران کۆبووەوە، پرسی سەرەکی کۆبوونەوەکەشیان " بەرەنگاربوونەوەی پەکەکە و داعش بوو"، هاوکات دۆخی سووریا و غەززە خرایە سەر مێزی گفتووگۆ. 

 

ئەو مانایەی دەیگەیێنێت: تورکیا دەیەوێت پەیوەندییە دیبلۆماسییەکانی لەگەڵ ئێران بپارێزێت لە پێناو پاراستنی ئاسایشی سنوورەکانی و فراوانکردنی پەیوەندییەکانی لەگەڵ وەڵاتان بۆ ڕازیکردنیان بە " پشتیووانی نەکردنی پەکەکە و مانەوەی لەو وڵاتانە". 

 

قووڵتر: لە دوای کەوتنی دەسەڵاتی بەشار ئەسەد و نەمانی کاریگەری ئێران و کشانەوەی لە سووریا، تا ڕاددەیەک ساردییەک کەوت نێوان پەیوەندییەکانی ئەو دوو وڵاتە، بە جۆرێک هەندێک لە میدیاکانی تورکیا هێرشیان دەکردە سەر ئێران بەوەی "هاوکاری سەربازی و درۆن بۆ پەکەکە دەنێرێت لە دژی تورکیا"، بەڵام هاکان فیدان، وەزیری دەرەوەی تورکیا لە بارەی ئەم پرسیارەوە گوتی : ڕەچاوی هەستیاری پەیوەندییەکەمان لەگەڵ ئێران دەکەین".