ئێران بە مەرج ئامادەیە لەگەڵ ئەمریکا دانووستان بکات

ئاڤا نیوز

وەزارەتی دەرەوەی ئێران ئامادەیی وڵاتەکەی بۆ دانووستان لەگەڵ ئەمریکا ڕاگەیاند، بەڵام مەرجی پێشوەختەی هەیە.

 

چیرۆکی سەرەکی: عەباس عێراقچی وەزیری دەرەوەی ئێران ڕایگەیاند، تاران ئامادەیە لەگەڵ واشنتن دانووستان بکات، بەڵام ئامادە نییە لە ژێر سەپاندنی سیاسەتی ئەوپەڕی گوشاردا بچێتە دانوستاندنەوە کە لەلایەن ئیدارەی ترەمپەوە سەپێندراوە. 

 

لێدوانی فەرمی: عەباس عێراقچی، وەزیری دەرەوەی ئێران لە پۆستێکیدا لە تۆڕی کۆمەڵایەتی تەلەگرام ڕایگەیاند: "هەڵگرتنی سزاکان لەلایەن ئەمریکاوە پێویستی بەدانووستانە، بەڵام نەک لە ژێر سیاسەتی پەیڕەوکردنی ئەو پەڕی گوشار، کە لەلایەن ترەمپەوە بەسەر ئێراندا سەپێنراوە، چونکە دانووستاندن لە دۆخێکی لەم جۆرەدا خۆبەدەستەوەدانە". 

 

باکگراوند: لێدوانەکەی وەزیری دەرەوەی ئێران لە کاتێکدایە، ڕۆژی هەینی عەلی خامنەیی ڕێبەری باڵای ئێران، داوای لە حکومەتی وڵاتەکەی کرد دانووستان لەگەڵ ئەمریکادا نەکات، چونکە هەنگاوێکی لەو جۆرە نابەرپرسیارانەیە.