بۆ یەکەمجار بەشێکی پێشمەرگەکانی یەکەی 80 بە هەژماری من مووچە وەردەگرن

ئاڤا نیوز

 

فەرمانبەران و مووچەخۆران بەردەوامن لەوەی خۆیان لە هەژماری من تۆمار بکەن، یەکەمجاریشە بەشێکی پێشمەرگەکانی یەکەی 80 لەڕێگەی هەژمارەکەوە مووچە وەردەگرن.

 

وێنە گەورەکە: بە مەبەستی ئاسانکاری زیاتر بۆ هاونیشتمانیان، حکومەتی هەرێمی کوردستان بەردەوامە لە پتەوکردنی ژێرخانی بە دیجتاڵیکردن، هەوڵەکانی حکومەت بۆ ئەوەیە سەرجەم مووچەخۆران بە هەژماری من مووچەکانیان وەربگرن.

 

لێدوانی فەرمی: سەرچاوەیەک لە تیمی هەژماری من بە ئاڤا میدیای ڕاگەیاند: بۆ مووچەی مانگی یەک، بەشێکی پێشمەرگەکانی یەکەی 80، زێرەڤانی و پێشمەرگەی لیوا هاوبەشەکان کە هاوکاریی هاوپەیمانان وەردەگرن لەڕێگەی هەژماری من مووچەکانیان وەردەگرن.

 

ئەوەی پێویستە بیزانیت: بۆ مووچەی مانگی یەک، 56 هەزار و 700 پێشمەرگە بە هەژماری من مووچە وەردەگرن:

-42 هەزار و 600 پێشمەرگەی لیوا هاوبەشەکان کە هاوکاریی هاوپەیمانان وەردەگرن.
-11 هەزار و 600 پێشمەرگەی زێرەڤانی.

-دوو هەزار و 500 پێشمەرگەی یەکەی هەشتا.

 

لەلایەکی دیکەوە: بۆ مووچەی مانگی شوبات، جگە لە هێزەکانی پێشمەرگە، 216 هەزار و 500 فەرمانبەری مەدەنی لەڕێگەی هەژمارەکەوە مووچە وەردەگرن.

 

ئەمەش بزانە:  720 هەزار فەرمانبەر خۆیان لە پرۆژەی هەژماری من تۆمارکردووە، زیاتر لە 550 ئامێری "ئەی تی ئێم" لە ناوچە جیاوازەکانی هەرێمی کوردستان دانراوە بۆ ئەوەی فەرمانبەران مووچەکانیان لەو ڕێگەیەوە وەربگرن.