داوای ڕاگرتنی هاوکارییەکانی ئەمریکا بۆ عێراق دەکرێت

ئاڤا نیوز

 

چەند کۆنگرێسمانێکی ئەمریکی فشار لە حکومەتی وڵاتەکەیان دەکەن، پێداچوونەوە بە پەیوەندییەکانی لەگەڵ عێراقدا بکات و سەرجەم گرووپە چەکدارەکان بخاتە لیستی تیرۆرەوە.

 

وێنە گەورەکە: ژمارەیەک لە ئەندامانی کۆنگرێسی ئەمریکا، هەوڵ دەدەن بۆ ئەوەی کۆشکی سپی "پێداچوونەوە" بکات بە پەیوەندییەکانی ئێستای لەگەڵ حکومەتی عێراق، دیارترینیان هاوکارییە ئەمنی و ئابوورییەکانە.

 

زانیاریی بەدەستهاتوو: ڕۆژنامەی "زە ناشیۆناڵ" لە ڕاپۆرتێكیدا ئاشکرای کردووە، چەندین ئەندامی کۆنگرێس هەوڵێکیان دەستپێکردووە بۆ فشارکردن لەسەر حکومەتی عێراق و محەممەد شیاع سوودانی، سەرۆکوەزیرانی عێراق بۆ ڕاگرتنی هاوکارییە سەربازیی و هەواڵگرییەکان بۆ عێراق و سەپاندنی سزای ئابووری بەسەر ئەو وڵاتەدا، هاوکات سەرجەم گرووپە چەکدارەکانی عێراق کە سەر بە ئێرانن بخاتە لیستی تیرۆرەوە.

 

ئەوەی پێویستە بیزانیت: لە چەند ڕۆژی ڕابردوودا 12 ئەندامی کۆنگرێسی ئەمریکا نامەیەکیان ئاڕاستەی وەزیری دەرەوەی وڵاتەکەیان کردبوو، کە سەرجەم گرووپە چەکدارەکانی سەر بە ئێران بەتایبەتی ڕێکخراوی بەدر، وەکو ڕێکخراوی تیرۆریستی بناسێنن.