لە بازگەکانی عێراق ڕێگریکردن لە بەرهەمی کارگەکانی هەرێمی کوردستان بەردەوامە

ئاڤا نیوز

 

کێشەی هەناردەکردنی بەرهەمی کارگەکانی هەرێمی کوردستان بۆ شارەکانی عێراق بەردەوامە، بارەکان یان دەبێت کاڵاکە کۆدی پیشەسازی عێراقی هەبێت یانیش ئەوەتا لە بازگەکانی مووسڵ و کەرکووک دەبێت بەرتیل بدات.

 

وێنە گەورەکە: زیاتر لە شەش مانگە ڕێگری لە هەناردەکردنی بەرهەمی کارگەکانی هەرێمی کوردستان بۆ شارەکانی عێراق دەستیپێکردووەتەوە، ئەمەش دەیان کارگە داخراون لەکۆی 10 هەزار کارگە لە هەرێمی کوردستان کە بەرهەمیان هەیە و تەنیا 35 یان بۆیان هەیە بەرهەم بۆ شارەکانی عێراق بنێرن، سەدان کرێکاریش بێ کاربوون.

 

لێدوانی فەرمی: گەیلان سەعید، سەرۆکی ژووری بازرگانی و پیشەسازی هەولێر بە ئاڤای گوت، "بڕیاربوو لیژنەیەکی هاوبەش لە نێوان هەولێر و بەغدا بۆ چارەسەری کێشەکانی پێکبهێنرێت، بەڵام هێشتا بەغدا نەهاتووەتە ژێرباری پێکهێنانی ئەو لیژنەیە و چارەسەری کێشەکان و ڕێگریکردن بەردەوامە."

 

ئەمەش بزانە: جگە لە ڕێگریکردن لە بەرهەمی کارگەکانی هەرێمی کوردستان، ئیمتیازەکانیشیان هاوتای کارگەکانی عێراق نییە لە کۆبوونەوەکاندا داوا کراوە ئیمتیازاتەکان ئەوانیش بگرێتەوە، وەک پاڵپشتی دارایی و لێخۆشبوون لە بڕێکی باج و پارەی کارەبا و چەند ئیمتیازێکی دیکە.