هەرێمی کوردستان بۆ بەهەمیشەییکردنی فەرمانبەرانی گرێبەست گفتوگۆ لەگەڵ بەغدا دەست پێ دەکات

ئاڤا نیوز

 

ماوەی سێ ڕۆژە تیمێکی هەرێمی کوردستان بۆ بەهەمیشەییکردنی فەرمانبەرانی گرێبەست لە بەغدایە و ئەمڕۆش کۆبوونەوەیەک بۆ هەمان بەمەبەست لەگەڵ لایەنی عێراقی کراوە.

 

وێنە گەورەکە: تیمێکی بەڕێوەبەری میلاكات لە وەزارەتی دارایی و ئابووری هەرێمی كوردستان کە پێکهاتوون لە عەبدوڵا رەمەزان، راوێژكار لە بودجە و نەهرەوان گەنجۆ، بەڕێوەبەری میلاكات لە وەزارەتی دارایی گفتوگۆیان لەسەر بەهەمیشەیكردنی فەرمانبەرانی گرێبەست لەگەڵ عێراق دەستپێكردووە، کە ژمارەیان زیاتر لە 31 هەزار فەرمانبەرە و چەندین ساڵە نەکراونەتە هەمیشەیی، ئەمڕۆ لە بە‌غدا كۆبوونەوەیەك کراوە و لەگەڵ هاوتاكانیان کۆبوونەوەتەوە و دۆسیەکەیان خستووەتە بەردەمیان.

 

زانیاریی بەدەستهاتوو: شاندەكەی كوردستان جەخت لە بەهەمیشەیكردنی فەرمانبەرانی گرێبەست دەكەنەوە و ئاماژە بەوە دەكەن كە مەسرور بارزانی، سەرۆکوەزیرانی کوردستان بڕیاری داوە ئەو فەرمانبەرانە بكرێن بە هەمیشیەیی و مافی خۆیانە، ئێستاش كە سێ تەمەن لەسەر داواكاری بەغدا بەپێی یاسایی خانەنیشینی یەكگرتووی عێراق خانەنیشن كراون لە بەشێكی فەرمانگەكان بۆشاییی دروست بووە و پێویستە فەرمانبەری نوێ شوێنیان بگرنەوە.

 
لەلایەکی دیکە: بەشێکی دیکەی كۆبوونەوەكە تایبەت بووە بە هاوتاکردنی ناونیشانی وەزیفی و پرسی دانانی ژمارەی وەزیفی بۆ فەرمانبەران.

ئەوەی  پێشبینی دەکرێت: ئەگەر وەزارەتی دارایی عێراق ڕەزامەندی لەسەر بەهەمیشەییکردنیان بدات کە مووچە و مۆڵەت و چەندین ئیمتیازاتی دیکەیان زیاد دەکات، پرۆسەکە دەستبەجێ ناکرێت و دەکەوێتە دوای پەسەندکردنی بودجەی 2025 و کارپێکردنی، چونکە چەند بڕیارێکی نوێ دراون لەبارەی دامەزراندن.