شای ئوردن و ترەمپ لە کۆشکی سپی باسیان لە ڕاگواستنی خەڵکی غەززە کرد

ئاڤا نیوز

 

دۆناڵد ترەمپ، سەرۆکی ئەمریکا، لە کۆشکی سپی پێشوازیی لە شا عەبدوڵای دووەم، شای ئوردن و شازادە حوسێن، شازادەی جێنشینی ئوردن کرد و دۆخی غەززەیان تاوتوێ کرد.

 

لێدوانی فەرمی:  شا عەبدوڵا، شای ئوردن ڕایگەیاند، "من لەو باوەڕەدام کە هەمیشە ڕێگایەک بۆ ئاشتی و خۆشگوزەرانی هەیە." سەبارەت بە پڕۆژەکەی ترەمپیش بۆ گواستنەوەی دانیشتوانی غەززە و نیشتەجێکردنیان لە میسر و ئوردن، شا عەبدوڵا گوتی، "پێویستە چاوەڕێ بین بزانین پڕۆژەی میسر بۆ کەرتی غەززە چۆنە کە بڕیارە پێشکەشی بکات."

 

بۆچوونی لایەنی بەرامبەر: لای خۆیەوە، دۆناڵد ترەمپ، سەرۆکی ئەمریکا جەختی لەسەر پڕۆژەکەی خۆی کردەوە و گوتی "فەلەستینییەکان لە شوێنێکی دیکە لە دەرەوەی کەرتی غەززە پارێزراو دەبن." ئەو گوتیشی، "لە میسر و ئوردن زەوی هەیە کە فەلەستینییەکان دەتوانن لە سەری بژین." ترەمپ گەشبین بوو بەوەی پڕۆژەکەی لەلایەن میسرەوە پەسەند بکرێت و گوتی "ئەگەری 99٪ هەیە کە لەم بارەوە لەگەڵ میسر بگەینە ڕێککەوتن."

 

ئەوەی پێشبینی دەکرێت: ترەمپ پێشتر هەڕەشەی ئەوەی کردبوو کە ئەگەر میسر و ئوردن پێشنیازەکەی پەسەند نەکەن، ئەوا یارمەتییە داراییەکانی ئەمریکا بۆ ئەو دوو وڵاتە ڕادەگرێت. 

 

ئەوەی پێویستە بیزانیت: ترەمپ دەیەوێت دانیشتوانی غەززە بە شێوەیەکی هەمیشەیی بۆ وڵاتانی دەرەوە بگوازرێنەوە و غەززە بکرێتە ناوچەیەکی گەشتیاری کە ئەمریکا بەڕێوەی ببات. ئەو هەروەها گوتی "لکاندنی کەرتی خۆرئاوا بە ئیسرائیلەوە کارێکی سەرکەوتوو دەبێت."

 

بە تەنیشت ئەم بابەتەوە: ترەمپ سووربوونی خۆی لەسەر مۆڵەتدان بە حەماس بۆ ئازادکردنی بارمتەکان تا کاتژمێر 12ـی ڕۆژی شەممە دووپات کردەوە، هاوکات گوتی، لەو باوەڕەدا نییە کە حەماس پابەندی مۆلەتەکە بێت و بارمتەکان ئازاد بکات.