سەرۆکوەزیرانی ئیسرائیل هەڕەشە لە حەماس دەکات

ئاڤا نیوز

بنیامین نەتانیاهۆ، سەرۆکوەزیرانی ئیسرائیل هەڕەشەی دەستپێکردنەوەی جەنگ لە حەماس دەکات، ئەگەر بێت و تا ڕۆژی شەممە بارمتە ئیسرائیلییەکان ئازاد نەکات.

وێنە گەورەکە: دوای ئەوەی بزووتنەوەی حەماس  بڕیاریدا ئاڵوگۆڕی بارمتە و دیلەکان لەگەڵ ئیسرائیل بۆ کاتێکی نادیار ڕابگرێت و هۆکارەکەیشی بۆ پابەندنەبوونی ئیسرائیل بە ڕێککەوتنی ئاگربەست گەڕاندەوە، دوای ئەم بڕیارە دۆنالد ترەمپ، سەرۆکی ئەمریکا هەڕەشەی لە حەماس کرد. ئەمڕۆش بنیامین نەتانیاهۆ  هۆشداری توندی دا بە هەڵگیرسانی جەنگی قورس لەگەڵ حەماس، ئەگەر بارمتەکان ئازاد نەکات.

ڕاگەیێنراوی فەرمی: بنیامین نەتانیاهۆ دوای کۆبوونەوەیەکی چوار کاتژمێری لەگەل بەرپرسانی ئیسرائیل ڕایگەیاند: ئەگەر حەماس تا شەممە هەموو بارمتەکان ئازاد نەکات، ئەوا ئاگربەست کۆتایی پێدەهێنین و تا کۆتایی هێنان بە حەماس لە جەنگی قورس دەبین لەگەڵیاندا، هەروەها فەرمانی بە هێزەکانی کردووە دوای بڕیارەکەی حەماس هێزەکانیان لە دەوررووبەری غەززە جێگیر بکەنەوە.

زانیاری زیاتر: ئەبو عوبەیدە، وتەبێژی کەتائیبی قەسام کە باڵی سەربازیی حەماسە دەڵێت لە ماوەی سێ هەفتەی ڕابردوودا بەوردی چاودێری پێشێلکارییەکانی ئیسرائیل و پابەندنەبوون بە مەرجەکانی ڕێککەوتنەکەیان کردووە بە هەموو جۆرەکانییەوە وەک ئەوەی لەسەری ڕێککەوتوون، بۆیە ڕادەستکردنی دیلەکان تا کاتێکی نادیار ڕادەگیرێن.

باکگراوند: بەپێی مەرجەکانی ڕێککەوتنی ئاگربەستی نێوان حەماس و ئیسرائیل کە قۆناغی یەکەمی لە 19-1-2025 کەوتە بواری جێبەجێکردنەوە، دەبووایە 33 بارمتەی ئیسرائیلی ئازاد بکرێن، بەڵام تەنیا 16ـیان ئازادکراون و 17 یان ماون، ئیسرائیل دەڵێت لەو 17 بارمتەیە 8 ـیان مردوون، لەبەرامبەردا نزیکەی هەزار و 900 زیندانی کە زۆربەیان فەڵەستینی بوون لەلایەن ئیسرائیل ئازادکراون.