حەماس ستایشی هەڵوێستی میسر و ئوردن دەکات

ئاڤا نیوز

 

بزووتنەوەی حەماس، سوپاسی هەڵوێستی هەریەکە لە وڵاتانی میسر و ئوردن دەکات لە بەرامبەر ڕەتکردنەوەی پلانەکەی دۆناڵد ترەمپ، سەرۆکی ئەمریکا بۆ چۆڵکردنی کەرتی غەززە.

 

ڕاگەیێنراوی فەرمی: ڕۆژی 12-2-2025، بزووتنەوەی حەماس ستایشی هەڵوێستی میسر و ئوردنی کرد و ڕایگەیاند: ''هەڵوێستی براکانمان لە ئوردن و میسر بەرز دەنرخێنین بۆ ڕەتکردنەوەی ئاوارەبوونی گەلەکەمان و هەڵوێستەکەیان سەبارەت بەوەی کە پلانێکی عەرەبی هەیە بۆ ئاوەدانکردنەوەی غەززە بەبێ ئاوارەکردنی دانیشتووانەکەی''.

 

ئەوەی پێویستە بیزانیت: ئەم ستایشەی حەماس دوای ئەوە دێت کە دۆناڵد ترەمپ، سەرۆکی ئەمریکا، پێشنیازی کرد دانیشتووانی کەرتی غەززە بگوازرێنەوە بۆ میسر و ئوردن و دواتر کەرتەکە ئاوەدان بکرێتەوە بەو جۆرەی ئەمریکا دەیەوێت، ئەمەش کاردانەوەی لەسەر ئاستی جیهان لێکەوتەوە، بەتایبەت لای وڵاتانی عەرەبی و ئیسلامی و پێشنیازەکەیان ڕەتکردەوە.

 

ئەوەی پێشبینی دەکرێت: دۆناڵد ترەمپ، هەڕەشەی ئەوە دەکات، ئەگەر میسر و ئوردن پێشنیاز و پلانەکەی ئەمریکا قبوڵ نەکەن، هاوکارییەکانیان بۆ ئەو وڵاتانە ڕادەگرن.