لەبارەی ڕاکێشانی پارە لە هەژماری بانکی مووچەخۆرانەوە بڕیاری نوێ دەردەچێت

ئاڤا نیوز

بانکی ناوەندی عێراق بەبڕیارێک تێچووی ڕاکێشانی پارە (عمولە) لە هەژماری بانکی مووچەخۆرانی حکومیی و کەرتی تایبەت بەرزدەکاتەوە، لەمەودوا لەجێگەی دوو هەزار دینار، چوار هەزار دینار وەردەگیرێت.

نوسراوی فەرمی: بەگوێرەی نوسراوێکی بانکی ناوەندی کە ئاڕاستەی سەرجەم بانکە مۆڵەتپێدراوەکان کراوە، لەمەودوا تێچووی دروستکردنی کارتی بانکیی و نوێکردنەوەی لەگەڵ ڕاکێشانی پارە لە هەژماری بانکیدا گۆڕانکاری بەسەردا دێت، گۆڕانکارییەکانیش بەم شێوەیە دەبن:

- بۆ دروستکردنی کارتی بانکی بەمەبەستی وەرگرتنی مووچە بەلایەنی زۆرەوە 15 هەزار دینار وەردەگیرێت.

- بۆ نوێکردنەوەی کارتی بانکی بەلایەنی زۆرەوە 15 هەزار دینار وەردەگیرێت.

- گۆڕینی کارتی بانک (فەرمانبەری حکومیی و تایبەت) بەلایەنی زۆرەوە 25 هەزار دینار وەردەگیرێت.

- بەڕێوەبردنی هەژماری بانکی و ئەو پارەیەی بانکەکە لە بەرامبەردا وەریدەگرێت: مانگانە 2 هەزار دینار دەبێت.

- ڕاکێشانی پارە بە ئامێری POC و ATM بەگوێرەی ڕێژەی سەدی دەبێت؛ واتە بۆ نموونە لە ملیۆنێک دینار لەنێوان 4 بۆ 6 هەزار دینار وەردەگیرێت، لە هەموو حاڵەتێکیشدا لە هەزار دینار کەمتر نابێت.

- حەواڵەی دەرەکی، 10 دینار بۆ هەر دۆلارێکی ئەمریکی.

ئەوەی پێویستە بیزانیت: ڕاکێشانی پارە لە ئەی تی ئێمی بانکەکەی خۆت هەر بە خۆڕایی دەمێنێتەوە، واتا ئەم نرخانەی سەرەوە تەنها لەسەر ئەی تی ئێمێک وەردەگیرێت کە هی بانکەکەی خۆت نییە.