وەزارەتی دارایی ئامادەکارییەکانی بۆ هاوتاکردنی ناونیشانی وەزیفی فەرمانبەران دەستپێکردووە

 

ئاڤا نیوز

وەزارەتی دارایی ئامادەکارییەکانی بۆ هاوتاکردنی ناونیشانی وەزیفی فەرمانبەرانی هەرێمی کوردستان دەستپێکردووە و داوا لە سەرجەم وەزارەت و فەرمانگە و دەستەکان دەکات لەماوەی هەفتەیەکدا ڕێکارەکان تەواوبکەن و بینێرن.

چیرۆکی سەرەکی: حکومەتی عێراق داوایکردبوو بۆ لیستی مووچەی مانگی دوو، هاوتاکردنی ناونیشانی وەزیفی فەرمانبەران تەواوبکات، بەڵام بەهۆی ئەوەی کارکردنی زۆری دەوێت بۆ مووچەی ئەم مانگە تەواو نابێت و لە مانگی سێ داواکارییەکە جێبەجێ دەکرێت و ناونیشانی وەزیفی هەموو مووچەخۆران هاوتا دەکرێت.

لە لایەکی دیکەوە: وەزارەتی دارایی هەرێمی کوردستان سەرقاڵی تەواوکردنی میزان موراجەعەی مانگی یەکی ئەمساڵە، کارەکانیشی لە قۆناغی کۆتاییدایە و ئەم هەفتەیە دەنێردرێت بۆ بەغدا، ئەمەیان مەرجێکی بەغدایە و بۆ ناردنی مووچەی هەر مانگێک دەبێت میزان موراجەعەی مانگی پێشخۆی بنێردرێت.

زانیاریی زیاتر: سەبارەت بە لیستی مووچەی مانگی دوو، سەرچاوەیەک لە وەزارەتی دارایی و ئابووری هەرێمی کوردستان بە ئاڤا میدیای ڕاگەیاند، بەشێکی زۆر لە وەزارەت و دەستەکان، لیستی مووچەی مانگی دوویان ئامادەکردوە، لیستەکە بە سیستەمی پەیڕۆڵ ئامادەکراوە و ئەوانی دیکەش لە چەند ڕۆژی داهاتوو تەواودەبێت و هەمووی پێکەوە دەنێردرێت بۆ بەغدا.