نێچیرڤان بارزانی و وەزیری دەرەوەی بەحرەین بارودۆخی ناوچەکە تاوتوێ دەکەن

ئاڤا نیوز

نێچیرڤان بارزانی، سەرۆکی هەرێمی کوردستان و وەزیری دەرەوەی بەحرەین، لەبارەی دۆخی سووریا و چەند پرسێکی دیکەی جێی بایەخی هاوبه‌ش، گفتوگۆیان كرد.

 

ڕاگەیێنراوی فەرمی: لە چوارچێوەی بەشداریکردنی لە کۆنفرانسی ئاسایشی میونشندا، نێچیرڤان بارزانی، سەرۆکی هەرێمی کوردستان، لەگەڵ د. عەبدولـلەتیف بن ڕاشد زەیيانی، وەزیری دەرەوەی شانشینی بەحرەین کۆبووەوە.

 

-هەردوولا پەیوەندییەکانی بەحرەینيان لەگەڵ عێراق و هەرێمی کوردستان تاوتوێ کرد، تیشکیان خستە سەر دوایین پێشهاتەکانی ناوچەکە، باسيان له‌ چۆنيه‌تيى بەهێزکردنی هاوکاريی دوولايه‌نه‌ لە بوارە هاوبەشەکاندا كرد.

 

زانیاریی زیاتر: نێچیرڤان بارزانی، سەرۆکی هەریمی کوردستان جەختی لەسەر گرنگيی فراوانکردنی ئاسۆی هاوکاريی نێوان هەرێمی کوردستان و شانشینی بەحرەین لە بوارە سیاسی و ئابوورییەکاندا کردەوە، ئاماژەی بە ڕۆڵی هەرێمی کوردستان لە بەهێزکردنی سەقامگیريی ناوچه‌كه‌دا کرد.

 

لەلایەکی دیکەوە: عەبدولـلەتیف بن ڕاشد زەیيانی، وەزیری دەرەوەی بەحرەین خواستى وڵاتەکەی بۆ بەهێزکردنی پەیوەندییەکانی لەگەڵ عێراق و هەرێمی کوردستان دەربڕی، ستایشی ڕۆڵی هەرێمی کوردستانی کرد لە پاراستنی ئاسایش و سەقامگیریی ناوچەکەدا.