ئیدارەی خۆسەر: کارەکانی کۆمیتەی ئامادەکاریی "کۆنگرەی دیالۆگی نیشتمانی" سووریا قبووڵکراو نین

ئاڤا نیوز

 

بەڕێوەبەرایەتیی ئیدارەی خۆسەر کارەکانی کۆمیتەی ئامادەکاریی "کۆنگرەی دیالۆگی نیشتمانی" لە سووریا ڕەت دەکاتەوە و دەڵێت، نوێنەرایەتیی گەلانی سووریا ناکات.

 

چیرۆکی سەرەکی: ڕۆژی 12ـی 2  پێکهاتەیەکی لیژنەیەکى حەوت کەسی بۆ  ئامادەکاریى "کۆنگرەى دیالۆگى نیشتمانى" لە سووریا بڵاوکرایەوە، بەڵام لیژنەکە هیچ ئەندامێکی کوردی تێدا نەبوو، ئەمەش کاردانەوەی لایەنە کوردییەکانی بەدوای خۆیدا هێنا.

 

بەیاننامەی فەرمی: ئەمڕۆ شەممە 15-2-2025، ئیدارەی خۆسەر لە باکوور و ڕۆژهەڵاتی سووریا ڕایگەیاند: قۆناغی ئێستای سووریا پێویستی بە نوێنەرایەتیی ڕاستەقینەی هەموو لایەنەکان هەیە، بەڵام لیژنەی ئامادەکاریی "کۆنگرەی دیالۆگی نیشتمانی" کە لەلایەن دەسەڵاتدارانی شامەوە ڕێکخراوە، پێوەری تاکلایەنەکان نیشان دەدات و دەرئەنجامی هەڵسەنگاندنێکی هەڵەیە بۆ دۆخی ئێستای سووریا.

 

-ئەو ئینکاری و  پشتگوێخستنەی لیژنەکە دەیکات، مەترسی لەسەر گەڕانەوەی وڵاتەکە بۆ سیستمی ناوەندیی پێشوو دروست دەکات.

-ئێمە چاوەڕێی ئەم دۆخە ناکەین، بۆ باکوور و ڕۆژهەڵاتی سووریاش قبووڵی ناکەین و نامانەوێت.
-پێویستە لە ڕێگەی بەشداری کارا و دیموکراسییانەی بزووتنەوەی سیاسی، مەدەنی و ژنان لە پرۆسەی ڕاگوزەر لەبەرچاو بگرن.
-نابێت ئیرادە و بڕیاری نزیکەی نیو ملیۆن سووری لە هەرێمەکەماندا پشتگوێ بخرێت.
-لیژنەی ئامادەکاری نوێنەرایەتی تەواوی گەلی سووریا ناکات، چاوەڕوانییەکانی پێکهێنەرانی وڵاتەکە بەدی نایەت.
-بە دوورخستنەوە و پشتگوێخستنی لایەنێک، مومکین نییە دیالۆگ پێک بێت.
-ئەم دوورخستنەوەیە دەستپێکی سیاسەتی پشتگوێخستنە و لەلایەن گەلانی سووریاوە قبووڵکراو نییە.
-هێزی وڵاتەکەمان(سووریا) لە یەکگرتوویی، یەکڕیزی و چارەنووسی هاوبەشدایە. 
-یەکگرتوویی زامنی ڕاستەقینەی ئایندەیەکی دیموکراسییە و شایەنی ڕەسەنایەتیی گەلی سووریا و قوربانییەکانی منداڵەکانیان بێت.