ئیمرالی لە دوورگەیەکی کشتوکاڵییەوە بۆ زیندانێکی تاکەکەسی و قەدەغەکراو

ئاڤا نیوز

 

یەکێک لەو دوورگانەی تورکیا کە لە کۆندا شوێنی ژیانی هاووڵاتییان بوو، ئێستا بووەتە ناوچەیەکی قەدەغەکراو و دەورووبەر بە مین ڕووپۆشکراو، ئەویش دوورگەی ئیمرالییە کە  ڕێبەری پارتی کرێکارانی کوردستانی تێدا زیندانی کراوە. 

 

چیرۆکی سەرەکی: پێش ڕێککەوتنی لۆزان دوورگەی ئیمرالی شوێنی هاووڵاتییانی ئاسایی بوو کە داهاتی سەرەکیان لە ڕێگەی کشتوکاڵ و ماسیگرتنەوە دەست دەکەوت، بەڵام دوای ئەوەی لە ساڵی 1923 خەڵکی ئەو ناوچەیە بۆ یۆنان گواسترانەوە، دوورگەکە بۆ ماوەیەکی زۆر کەسی لەسەر نەدەژیا. 

 

جوگرافیای ناوچەکە: ڕووبەرووی دوورگەکە کەمتر لە 10 کیلۆمەتر چوارگۆشەیە و دەکەوێتە سەر دەریای مەرمەرە سەربە پارێزگای بورسای تورکیا. 

 

زانیاریی زیاتر: ئیمرالی لەسەردەمە جیاوازەکاندا:-

 

-لەسەردەمی عوسمانییەکان بۆ دوورخستنەوەی کەسایەتییە سیاسییەکان و بنەماڵەی سوڵتانەکان بەکارهێنراوە.
- لە ساڵی 1935 بۆ یەکەمجار کەنیسەیەکی ئەو دوورگەیە کراوەتە زیندان و نزیکەی 50 کەسیان بۆ گواستووەتەوە. 
- لە ساڵی 1961 عەدنان مەندەریس، سەرۆکوەزیرانی ئەوکاتەی تورکیا لەو دوورگەیە لە سێدارە درا.
- لە ساڵی 1999 سەرجەم ئەو کەسانەی لەو ناوچەیە زیندانی کرابوون گواسترانەوە بۆ زیندانەکانی دیکەی تورکیا.
- هەر لەساڵی 1999 عەبدوڵڵا ئۆجەلان، ڕێبەری پارتی کرێکارانی کوردستان 'پەکەکە' لەو دوورگەیە زیندانی کرا و زینداکە گۆڕدرا بۆ زیندانی تاکەکەسی. 
- دوای فشارە نێودەوڵەتییەکان بۆ سەر تورکیا، سێ زیندانیکراوی دیکە بۆ دوورگەکە گواستراونەتەوە. 

 

ئەوەی پێویستە بزانیت: ئیمرالی ئێستا ناوچەیەکی قەدەغەکراوە و دەورووبەری بە مین ڕووپۆشکراوە، تێپەڕبوون لە نزیک یاخود لە ئاسمانیشەوە قەدەغەیە، هێزیکی 700 کەسی تایبەت چاوەدێری بەردەوامی دوورگەکە دەکەن.