لە عێراق 84%ـی پڕۆژە بچووکەکان"ڕێکنەخراون و نافەرمین"

ئاڤا نیوز

شارەزایەکی ئابووری دەڵێت، سیستمی دارایی نافەرمی لە عێراق خەریکە قەبارەی سیستمی دارایی فەرمی تێدەپەڕێنێت، جەختیش دەکاتەوە کە ئێستا 84%ـی پڕۆژە بچووکەکانی عێراق لەناو سیستمی دارایی فەرمیدا "ڕێکنەخراون و نافەرمین".

بۆچی گرنگە: بوونی سیستمی بانکی نافەرمی مەترسی لەسەر توانای دەوڵەت بۆ کۆنتڕۆڵکردنی جوڵەی پارە دروستدەکات، چونکە دەرفەتی خۆدزینەوە لە باج و سپیکردنەوەی پارە زیاتر دەکات، لە وڵاتانی پێشکەوتوودا ئەو دامەزراوانە دەخرێنە ژێر چاودێری بانکی ناوەندیی و یاسا و ڕێكاری چاودێرییان بۆ دادەنرێت.

راگەیێنراوی فەرمی: مەنار عوبەیدی، سەرۆکی دامەزراوەی عێراقی ئاییندە بۆ توێژینەوە و ڕاوێژکاری ئابووری لە ڕاگەیێنراوێکدا دەڵێت:

٠ لە 20 ساڵی ڕابردوودا هەندێک دامەزراوە دروستبوون کە کاری هاوشێوەی بانکە فەرمییەکان ئەنجام دەدەن، لەوانەش پێدانی قەرز و دانان و ڕاکێشانی پارە لە ناوخۆ و دەرەوە، لەناویشیاندا هەن کە دەروازەیان بۆ دابەشكردنی مووچەی فەرمانبەران و خزمەتگوزاری دیکەی داراییش هەیە.

٠ ئەو دامەزراوانە دوورن لە چاودێریی و ئەوەش وایکردووە کارەکانیان بەراورد بە بانکە فەرمییەکان خێراتربێت، بووەتە هۆی ئەوەی ببنە جێگای سەرنجی خاوەن پڕۆژە بچوک و مامناوەندییەکان.

٠ لە عێراق 84%ـی پڕۆژە بچووکەکان لەناو سیستمی ئابووریدا ڕێکنەخراون و بەفەرمی تۆمارنەکراون، ئەوەش وایکردووە لە خزمەتگوزاری بانکە فەرمییەکان بێبەش بن و ڕوو لە دامەزراوە ئابوورییە نافەرمییەکان بکەن، بۆ وەرگرتنی هاوکاری دارایی.

٠ ئەگەر نەخرێنە ژێر چاودێری بانکی ناوەندییەوە، گرنگە کار بۆ هەڵوەشاندنەوەی دامەزراوە بێ مۆڵەتەکان بکرێت.

٠ لە پاڵ جێبەجێکردنی یاسا و نەرمی نواندن بۆ هاندانی دامەزراوە نافەرمییەکان تا تێکەڵ بە ئابووری فەرمی ببن، گرنگە گەرەنتی ئەوەش بکرێت کە ئابووری لە مەترسییە گریمانە کراوەکان دووربێت.