دوو ساڵە نزیکەی 300 یاریدەدەری دادوەر چاوەڕێی گۆڕینی ناونیشانەکانیان دەکەن

 

ئاڤا نیوز

بەشێک لە فەرمانبەرانی دادگاکان داوای گۆرینی ناونیشانیان دەکەن لە یاریدەدەری دادوەری بۆ لێکۆڵەری دادی، ئەنجوومەنی دادوەریش دەڵێت مافی خۆیانە، بەڵام کێشەکە تەرخانی داراییەو لەگەڵ بەغدا لە گفتوگۆین.

چیرۆکی سەرەکی: ژمارەیەک فەرمانبەری دادگاکانی هەرێمی کوردستان کە ناونیشانیان یاریدەدەری دادوەریە و ژمارەیان نزیکەی 300 یاریدەدەرە، چەند ساڵێکە چاوەڕێی پلە بەرزکردنەوە دەکەن و لە ڕێگەی ئاڤاوە داوادەکەن کە بەدواداچوون بۆ کەیسەکەیان بکرێت.

زانیاریی بەدەستهاتوو: ئەو فەرمانبەرانە دەڵێن مافی خۆیانە کە ناونیشانیان بگۆڕدرێت بۆ لێکۆڵەری دادی، سەرجەم دادگاکانی کوردستان و بنکەکانی پۆلیس پێویستی بە لێکۆڵەری دادییە، خزمەتمان لە 10 ساڵ بۆ سەرەوەیە لە 2013 ـەوە تەرفیع وەستاوە، ئێمە لە کەلار تاوەکو زاخۆ چاوەڕێی ئەم بڕیارەین خۆمان بە مافخوراو دەزانین. ئەگەر ئەو ناونیشانەمان بگۆڕدرێت 500 هەزار دەرماڵەمان بۆ زیاد دەبێت و مووچەی پیشەییمان دەبێتە 75%.

لێدوانی فەرمی: ئاڤا بەدواداچوونی کرد، لەگەڵ ئەنجوومەنی دادوەری قسەی کرد و وتیان، "ئەوەی داوای دەکەن مافێکی ڕەوای خۆیانە و کێشەی سەرەکی تەرخانی داراییە کە دەبێت لە بەغداوە چارەسەر بکرێت، ئێستاش تەرفیع و عەلاوە لە سەرتاسەری عێراق ڕاگیراوە، بەڵام حەقیان نافەوتێت ئەم کەیسە لە چوارچێوەی ئەو کەیسانەیە کە لەگەڵ بەغدا گفتوگۆیان لەسەر دەکرێت."

لە لایەکی دیکەوە: ڕێکارێکی دیکە هەیە کە پۆلینکردنی ئەو یاریدەدەرانەیە، چونکە مەرجە لێکۆڵەری دادی لە دادگای لێکۆڵینەوە و بنکەی پۆلیس دەوام بکەن، ئەوانە بەشێکیان تەنیا فەرمانبەری دادگاکانن.