هاکان فیدان: دەبێت هەموو گرووپە چەکدارەکانی سووریا لە چوارچێوەی سوپای نیشتمانی کۆبکرێنەوە

ئاڤا نیوز

 

وەزیرانی دەرەوەی سووریا و تورکیا  لە پانێڵێکی "کۆنفرانسی ئاسایشی میونشن" داوایان لە هەموو هێزە چەکدارەکانی سووریا کرد چەکەکانیان ڕادەستی حکومەتی نوێی سوریا بکەن.

 

وێنە گەورەکە: شەوی ڕابردوو ڕێککەوتی 15ـی 2ـی 2025 هاکان فیدان، وەزیری دەرەوەی تورکیا و ئەسعەد شەیبانی، وەزیری دەرەوەی سووریا بەشداریان لە پانێلێکی "کۆنفرانسی ئاسایشی میونشن" کرد و باسیان لە دۆخی سووریا و دروستکردنی سوپایەکی نیشتیمانی لە سووریا کرد.

 

لێدوانی فەرمی: هاکان فیدان، وەزیری دەرەوەی تورکیا لە بەشێکی پانێڵەکەدا وتی، لە دەرەوەی سوپای نیشتیمانی هیچ ‌هێزێکی دیکەی چەکدار لە سووریا ڕێگەپێدراو نییە و دەبێت هەموو چەک و هێزەکان لە ژێر چەتری یەک سووپای نیشتمانیی کۆبکرێنەوە و هەموو دەسەڵاتە سەربازییەکان بۆ حکومەتی سووریا بگەڕێتەوە.

 

لەلایەکی دیکەوە: ئەسعەد شەیبانی، وەزیری دەرەوەی سووریا ڕایگەیاند، تەنها سوپایەکی نیشتمانیی زامنی یەکپارچەیی خاکی سووریا و جێگیربوونی سەقامگیری و ئاسایشە لە سووریا و ناوچەکە.