ئەمریکا کوژرانی سەرکردەیەکی دیاری قاعیدە لە سووریا ڕادەگەیێنێت

ئاڤا نیوز

فەرماندەیی ناوەندیی ئەمریکا، کوژرانی سەرکردەیەکی دیاری ڕێکخراوێکی سەر بە قاعیدە لە باکووری ڕۆژئاوای سووریا لە هێرشێکی ئاسمانیدا ڕادەگەیێنێت.

 

وێنە گەورەکە: هێزەکانی ئەمریکا لە چوارچێوەی هاوپەیمانیی نێودەوڵەتی بۆ بەرەنگاربوونەوەی داعش و ڕێکخراوە تیرۆریستییەکان لە عێراق و سووریا پاڵپشتی سەرەکی و ڕاستەخۆی هێزە کوردییەکان لە ڕۆژئاوای کوردستان و هێزەکانی پێشمەرگە و هێزە عێراقییەکان دەکات.

 

ڕاگەیێنراوی فەرمی: بەگوێرەی ڕاگەیێنراوی فەرماندەیی ناوەندیی ئەمریکا "سێنتکۆم" هێزەکانیان لە 15ی شوبات لە باکووری ڕۆژئاوای سووریا هێرشێکی ئاسمانی وردیان ئەنجامدا و لە ڕێگەیەوە بەرپرسێکی دیاری ڕێکخراوی "حوراس دین"ی سەر بە قاعیدەیان کردە ئامانج، کە بەرپرسی دارایی و لۆجیستی ڕێکخراوەکە بووە.

- ئەم هێرشە بەشێکە لە پابەندبوونی بەردەوامی هێزەکانی ئەمریکا، لەگەڵ هاوبەشەکانمان لە ناوچەکەدا، بۆ لەنێوبردنی هەوڵەکانی تیرۆریستان بۆ پلاندانان و ڕێکخستن و جێبەجێکردنی هێرشەکان دژی هاووڵاتییانی مەدەنی و سەربازانی ئەمریکی و هاوپەیمان و هاوبەشەکانمان لە ناوچەکە و دەرەوەی وڵات.

- مایکل ئێریک کۆریلا، فەرماندەی فەرماندەیی ناوەندی ئەمریکا ڕایگەیاند: بەردەوام دەبین لە ڕاوەدوونانی تیرۆریستان بە مەبەستی بەرگریکردن لە نیشتمانی خۆمان و لە ژیانی هێزەکانی ئەمریکا و هاوپەیمانان و هاوبەشەکانی لە ناوچەکەدا.