حیزبوڵڵای لوبنان بە ڕێوڕەسمێکی ملیۆنیی تەرمی حەسەن نەسروڵڵا بەخاک دەسپێرێت

ئاڤا نیوز

 

ئامادەکارییەکانی حیزبوڵڵای لوبنان بۆ بەخاکسپاردنی هەردوو ئەمینداریی پێشووی بەردەوامن، حەسەن نەسروڵڵا لە بەیرووت و هاشم سەفیەدینیش لە باشووری لوبنان بەخاک دەسپێردرێن، یەکشەممەی داهاتووش بۆ بەخاکسپاردنیان ڕێوڕەسمی ملیۆنیی ڕێکدەخرێت.

 

ئەوەی پێویستە بیزانیت: 27ی ئەیلوولی ساڵی ڕابردوو حەسەن نەسروڵڵای، ئەمینداری پێشووتر و 3ی تشرینی دووەمیی هەمان ساڵیش هاشم سەفیەدینی، ئەمینداری پێشووی حیزبوڵڵای لوبنان، لە ئەنجامی بۆردوومانی چڕی فرۆکە جەنگییەکانی ئیسرائیل بۆ سەر ناوچەکانی باشووری بەیرووتی پایتەخت کوژران و لەو کاتەوە تا ئێستا لە شوێنێکی نهێنیی و بەشێوەیەکی کاتی بەخاکسپێردراون، بڕیاریشە 23ی ئەم مانگە هەردووکیان لە ڕێوڕەسمێکی فەرمیدا بە خاک بسپێردرێن.

 

بینراو و بیستراو: مەزارگەکەی حەسەن نەسروڵڵا دەکەوێتە سەر ڕێگای کۆن و نوێی فڕۆکەخانەی ڕەفیق حەریری لە بەیرووت، هاشم سەفیەدینیش لەسەر وەسییەتی خۆی لە شارۆچکەی دیر قانوونی باشووری لوبنان بە خاک بسپێردێت.

 

- شوێنی بەخاکسپاردنی حەسەن نەسروڵڵا دەکرێتە مەزارگەیەکی گەورە و ڕۆژانە پێشوازیی لە هەزاران زیارەتکار دەکات.

 

لێدوانی فەرمی: بەوتەی عەلی زاهر، ڕێکخەری باڵای ڕێوڕەسمی بەخاکسپاردنی حەسەن نەسروڵڵا و هاشم سەفیەدین هەردوو ئەمینداری پێشووی حیزبوڵڵای لوبنان، جگە لە بەشدارییەکی فراوانی خەڵک، لە 79 وڵاتی جیهانەوە خەڵک بانگهێشتکراون و بەشداری لە ڕێوڕەسمەکەدا دەکەن.