وەزیری دەرەوەی ئەمریکا بۆ ئامادەکاریی کۆبوونەوەی ترەمپ و پووتین گەیشتە سعودییە

ئاڤا نیوز

 

مارکۆ ڕۆبیۆ، وەزیری دەرەوەی ئەمریکا بۆ ئامادەکارییەکانی کۆبوونەوەی نێوان دۆناڵد ترەمپ، سەرۆکی ئەمریکا و ڤلادیمێر پووتین، سەرۆکی ڕووسیا بە سەردانێکی فەرمی گەشتە سعودییە. 

 

وێنە گەورەکە: بڕیارە کۆتایی ئەم مانگە دۆناڵد ترەمپ، سەرۆکی ئەمریکا و و ڤلادمێر پووتین، سەرۆکی ڕووسیا، لە سعودییە لەسەر پرسی کۆتاییهێنان بە جەنگی سێ ساڵەی نێوان ئۆکراینا و ڕووسیا کۆببنەوە، پێشتریش لە هەفتەی ڕابردوودا ترەمپ و پووتین بە تەلەفۆن قسەیان کردووە و سەردانەکەی ئەمڕۆی وەزیری دەرەوەی ئەمریکاش بۆ سعودییە بۆ ئامادەکاریی ئەو کۆبوونەوەیەیە.

 

ڕاگەیێنراوی فەرمی: بەپێی ڕاگەیێنراوە فەرمییەکان، بڕیار وایە ئەمڕۆ وەزیری دەرەوەی ئەمریکا لەگەڵ بەرپرسانی سعودییە کۆببێتەوە و پلان و ئامادەکارییەکان بۆ کۆبوونەوەی سەرۆکی ئەمریکا و ڕووسیا بە بەشداری محەممەد بن سەلمان، شازادەی جێنشینی سعودییە دەست پێبکەن.

 

زانیاریی زیاتر: سەردانەکەی مارکۆ ڕۆبیۆ دوای پەیوەندییە تەلەفۆنییەکەی هەفتەی ڕابردوویان دێت لەگەڵ سێرگی لاڤرۆڤ، وەزیری دەرەوەی ڕووسیا، کە تێیدا باسیان لە دەستپێکردنەوەی گفتوگۆی نێوان ڕووسیا و ئەمریکا و پاراستنی پەیوەندییەکانی نێوان ئەو دوو وڵاتە و هاوکاریکردنی دوولایەنە لەسەر پرسەکانی دۆخی ئۆکراینا و فەڵەستین و ڕۆژهەڵاتی ناوەڕاست کردبوو، هەر لەو پەیوەندییەشدا بڕیاریاندابوو وێستگەی یەکەمی دیدار و کۆبوونەوەکانی ترەمپ و پووتین لە سعودییە بێت.