سەرۆکی دیوانی چاودێری دارایی عێراق بۆ ئاڤا: وردبینی بۆ خەرجییەکانی کوردستان دەکەین

ئاڤا نیوز

سەرۆکی دیوانی چاودێری دارایی عێراق ڕایگەیاند، وردبینیی بۆ خەرجیی و داهاتەکانی هەرێمی کوردستان بۆ شەش مانگی کۆتایی ساڵی 2024 دەکەن و لەماوەی چەند ڕۆژی داهاتوودا ڕاپۆرتی خۆیان بۆ حکومەتی فیدڕاڵ بەرزدەکەنەوە.

چیرۆکی سەرەکی: دوێنێ ئاوات شێخ جەناب وەزیری دارایی و ئابووری هەرێمی کوردستان لە هەولێر، لەگەڵ تیمی هاوبەشی دیوانی چاودێری دارایی عێراق و هەرێمی کوردستان کۆبووەوە و ڕایگەیاند، دەرگای وەزارەت و دامەزراوەکان بەردەوام کراوەیە بۆ تیمەکان تا بتوانن لە نزیکترین کاتدا ڕاپۆرتی خۆیان ئامادە بکەن. 

لێدوانی فەرمی: د.عەممار سوبحی، سەرۆکی دیوانی چاودێری دارایی عێراق بە ئاڤا میدیای ڕاگەیاند، "ئامانجی سەردانی شاندەکەمان بۆ کوردستان بۆ وردبینیکردنە لە داهاتی نەوتی و نانەوتی و خەرجییەکانی هەرێمی کوردستان بۆ شەش مانگی کۆتایی ساڵی 2024، ئەوەش جێبەجێکردنی یاسای بودجەیە و ئومێدەوارین لە چەند ڕۆژێکی کەمدا کارەکان تەواو بن".

بەشێکی دیکە لە قسەکانی د.عەممار سوبحی، سەرۆکی دیوانی چاودێری دارایی عێراق:

- کاری وردبینییکردن بۆ ڕاستکردنەوەی هەڵەکانە و ڕێکارێکی ئاساییە.

- کاری هاوبەشمان لەگەڵ دیوانی چاودێریی دارایی هەرێمی کوردستان هەیە و دەستکەوتی هاوبەشیشمان هەبووە، ڕاپۆرتەکانیشمان پێکەوە ئاڕاستەی حکومەتی فیدڕاڵ و حکومەتی هەرێمی کوردستان دەکەین.

- تێبینییەکانی ئێمە بۆ باشترکردنی کاروبارەکان و چارەسەری کێشەکانە تا لە داهاتوودا کارەکان لەسەر ڕێڕەو و ئاڕاستەیەکی ڕاست بێت.