گەنجینەی عێراق تووشی کورتهێنانی نەختینەی گەورە بووەتەوە

ئاڤا نیوز

 

بەپێی بەڵگەنامەیەک کە ئاراستەی نووسینگەی سەرۆکوەزیرانی عێراق کراوە و واژۆی تەیف سامی لەسەرە، باس لەوەکراوە کە گەنجینەی دەوڵەتی تووشی کورتهێنانێکی گەورەی نەختینەی بووەتەوە. 

 

چیرۆکی سەرەکی: دوای ئەوەی نووسینگەی سەرۆکوەزیرانی عێراق داوای بەهەمیشەییکردنی بەشێک لەفەرمانبەرانی گرێبەست لەوەزارەتی کارەبا دەکات، وەزارەتی دارایی عێراق بە نووسراوی ژمارە 468، کە لە رۆژی 9-2-2025 لەلایەن تەیف سامییەوە واژۆی لەسەر کراوە، وەڵامی ئەو نووسراوە دەداتەوە ئاشکرای دەکات کە لەم کاتەدا  گەنجینەی دەوڵەت کێشەی گەورەی مسۆگەرکردنی مووچەی فەرمانبەران و خانەنشینان و چاودێری کۆمەڵایەتی هەیە، ناتوانرێت ئەو فەرمانبەرانە بەهەمیشەیی بکرێن.

 

لێدوانی فەرمی: ئامال ناسری ئەندامی لیژنەی ئابووری و پیشەسازی و بازرگانی لە پەرلەمانی عێراق، ڕایگەیاند: پێویستە وەزارەتی دارایی هۆکاری ڕاستەقینەکانی کورتهێنانی دارایی و کەمی پارەی نەختینە بۆ ڕای گشتیی و پەرلەمانی عێراق ئاشکرا بکات، چونکە ئەم بابەتە ڕاستەخۆ پەیوەندی بەبژێوی ژیانی هاووڵاتییانەوە هەیە و نابێت ڕاستییەکان لەمە زیاتر بشارێنەوە.

 

لەلایەکی دیکەوە: مەنار عوبەیدی، شارەزای ئابووری دەڵێت: " لەم دواییانەدا دابینکردنی دیناری عێراقی قورستر بووە بەهۆی بێ پلانی حکومەتەوە، ئەمەش دەبێتە هۆی دواکەوتنی خەرجکردنی مووچەی فەرمانبەران سەرەڕای بوونی سەرچاوەی داهاتی پێویست.