شەپۆلێکی سەرما بەڕێوەیە لە 10 ساڵی ڕابردوودا هاوشێوەی نەبووە

ئاڤا نیوز

 

دەزگاکانی کەشناسیی هۆشداری لە هاتنی شەپۆلێکی سەرما و سۆڵە لە ناوچەکە دەدەن  کە هەرێمی کوردستانیش دەگرێتەوە. هاوکات شێخ دارا، پێشکەشکاری کەشوهەوا دەڵێت، بەفر و بارانبارینەکە سەرجەم ناوچەکان دەگرێتەوە.

 

وێنە گەورەکە:  شەپۆلی سەرما و سۆڵەیەکی تووند بەڕێوەیە و لە 10 ساڵی ڕابردوودا هاوشێوەی نەبووە، هاوکات پێشبینی دەکرێت بارانبارینی زۆر و بەفر سەنتەری شارەکان بگرێتەوە، هۆشدارییش لەبارەی دروستبوونی لافاویش دەدرێت و ئێستا شەپۆلەکە گەیشتووەتە وڵاتانی دراوسێ بە تایبەت تورکیا.

 

لێدوانی فەرمی: شێخ دارا، پێشکەشکاری کەشوهەوا لە ئاڤا میدیا، ڕایگەیاند: کاریگەری شەپۆلێکی دەریای سپی ناوەڕاست بە تەواوی لە سەرتاسەری هەرێمی کوردستان نزیک دەبێتەوە، بۆیە بەفر و بارانبارین لەسەرجەم ناوچەکان دەبارێت، مەترسی دروستبوونی لافاو لە سەرجەم شارەکان دەبێت، هاوکات ئەگەری بەردەوامی شەپۆلەکەش تاوەکو ڕۆژی یەکشەممە و دووشەممەی هەفتەی داهاتوو هەیە.

زانیاریی زیاتر: شارەزایانی کەشناسی هۆکاری ئەم سەرمایە بۆ گەردەلوولی سەرمای جەمسەری باکوور دەگەڕێننەوە کە دزە دەکات و لە شوێنی خۆی دەترازێت و دەگاتە زۆر شوێنی دیکە و کاریگەریی دەبێت.

لەلایەکی دیکە: بەشێک لە وڵاتانی ئەمریکا و ئەوروپا هۆشدارییان لە شەپۆلی سەرماکە داوە و ڕایانگەیاندووە کە سەرمایەک دەبێت لە چەند دەیەی ڕابردوودا وێنەی نەبووە، بۆیە ڕێکاری پێویستیان گرتووەتە بەر و داوایان لە هاووڵاتیانیان کردووە خۆیانی بۆ ئامادە بکەن. 

ئەمەش بزانە: کاریگەرییەکانی شەپۆلی سەرماکە گەیشتووەتە تورکیا و لە ئەستەمبوول بەفرێکی سەخت دەبارێت، بەم هۆیەشەوە کێشە بۆ ژمارەیەک لە گەشتە ئاسمانییەکان دروست بووە و دەوامیش لە قوتابخانەکانی ئەو گەورە شارە کراوەتە پشوو. 

کاریگەری و لێکەوتەکان: کۆمپانیای هێڵە ئاسمانییەکانی تورکیا بەشێک لە گەشتە ئاسمانییەکانی فڕۆکەخانەی ئیستەنبووڵی ڕۆژانی پێنج شەممە و هەینی، بەهۆی بەفربارینەوە هەڵوەشاندەوە.