پسپۆڕێکی ئابووری: ئەمریکا لەڕێگەی هەناردەکردنەوەی نەوتی کوردستان دەیەوێت سەرچاوەی داهاتی ئێران وشک بکات

ئاڤا نیوز

 

پسپۆڕێكی ئابووری ڕایدەگەیەنێت، فشارەكانی ئەمریكا لەسەر عێراق بۆ دەستپێكردنەوەی هەناردەكردنەوەی نەوتی هەرێمی كوردستان، پەیوەندیی بەو پلانەی ئیدارەی نوێی كۆشكی سپییەوە هەیە كە دەیەوێت لەڕێگەی فشاری توند سەرجەم سەرچاوەی داهاتی ئێران وشك بكات.

 

وێنە گەورەكە: بەگوێرەی ڕاپۆرتێكی ئاژانسی ڕۆیتەرز، ئیدارەی دۆناڵد ترەمپ، سەرۆکی ئەمریکا گوشاری خستووتە سەر عێراق بۆ ئەوەی هەناردەی نەوتی هەرێمی کوردستان دەستپێبکاتەوە، ئەگینا هاوشێوەی ئێران سزا بەسەر عێراقیشدا دەسەپێنێت. ئەوەش لەكاتێكدا، حەیان عەبدولغەنی، وەزیری نەوتی عێراق، بەشێوەیەکی لەناکاو ڕایگەیاند، هەفتەی داهاتوو هەناردەکردنەوەی نەوت لە هەرێمی کوردستان دەستپێدەکاتەوە.

 

لێدوانی فەرمی: دكتۆر نەبەز نەوزاد، ئابووریناس و پسپۆڕی بواری ئاسایشی وزە تایبەت بە ئاڤای ڕاگەیاند، ئیدارەی ترەمپ كار بۆ ئەوە دەكات هەناردەی نەوتی ئێران بۆ بازاڕی نێودەوڵەتی بەیەكجاری بنبڕ بكات، بۆ ئەوەی مەترسیش لەسەر ئاسایشی وزە لە جیهان دروست نەبێت، ئەمریكا پێویستی بە جێگرەوەی نەوتی ئێران هەیە بۆ پڕكردنەوەی پێداویستی بازاڕەكانی جیهان.

 

هۆكارە زانراوەكان: ئەو پسپۆڕە ئابوورییە ڕوونیشی كردەوە، بەردەوامی قەیران و شەڕی غەززە و ئۆكراینا كاریگەری گەورەی لەسەر بازاڕی وزەی جیهانی هەبووە، ئێستا لەهەموو كاتێك زیاتر ئەمریكا و وڵاتانی بەكارهێنەری وزە، پێویستیان بە سەقامگیركردنی ئاسایشی وزە هەیە لەڕێگەی زیادكردنی بەرهەمهێنان و گواستنەوەی نەوت لەڕێگەی بەندەرە جیهانییەكان.